ق ر اۋىل شارۋاشىلىعى ۆيسە-مينيسترى ازات سۇلتانوۆ ۇكىمەت وتىرىسىندا بيىلعى 11 ايدا اۋىل شارۋاشىلىعى جالپى ءونىمىنىڭ كولەمى 11،6% جىلدىق جوسپارمەن 13،4%-عا ارتىپ، 7،8 ترلن تەڭگەنى قۇراعانىن حابارلادى.
ونىڭ ايتۋىنشا، بۇل ءوسىم وسىمدىك شارۋاشىلىعىنداعى ءوندىرىس كولەمىن 19،9%-عا، مال شارۋاشىلىعىندا 3،2%-عا ۇلعايتۋ ەسەبىنەن قامتاماسىز ەتىلگەن، دەپ حابارلايدى aqshamnews.kz.
«وسىمدىك شارۋاشىلىعىندا ورتاشا ونىمدىلىك گەكتارىنا 16،1 سەنتنەر بولعاندا 26،7 ملن توننا استىق جينالدى، ونىڭ ىشىندە بيداي – 19،8 ملن توننا، كۇرىش – 563 مىڭ توننا. سونداي-اق 2،9 ملن توننا كارتوپ، 3،9 ملن توننا كوكونىس، 3،2 ملن توننا مايلى داقىلدار جانە 300 مىڭ توننا ماقتا جينالدى. مال شارۋاشىلىعىندا سويىس سالماقتا ەت ءوندىرىسىنىڭ 4%-عا، سيىر ءسۇتىنىڭ 4،4%-عا جانە تاۋىق جۇمىرتقاسىنىڭ 1،2%-عا وسكەنى بايقالدى»، — دەپ ناقتىلادى ازات سۇلتانوۆ.
اۋىل شارۋاشىلىعىندا ءوندىرىستىڭ ءوسۋى تابيعي-كليماتتىق جاعدايلاردىڭ قولايلى بولۋى جانە ۇكىمەتتىڭ ەگىس جۇمىستارىن قارجىلىق جانە ماتەريالدىق-تەحنيكالىق قامتاماسىز ەتۋ شارالارىن ۋاقىتىندا قابىلداۋى ەسەبىنەن قامتاماسىز ەتىلدى. العاش رەت كوكتەمگى ەگىس جۇمىستارىنا بەرىلەتىن جەڭىلدەتىلگەن كرەديت كولەمى 3 ەسەگە ۇلعايتىلىپ، جىلدىق تازا 5%-بەن رەكوردتىق 580 ملرد تەڭگەگە دەيىن جەتكىزىلدى. وسىنداي قارجىلاي قولداۋدىڭ ارقاسىندا استىقتىڭ كوپ مولشەردە جينالۋىنا بايلانىستى ەنگىزىلگەن مينەرالدى تىڭايتقىشتار كولەمى 1،2 ملن.توننانى قۇرادى، بۇل وتكەن جىلدىڭ دەڭگەيىنەن 2 ەسە جوعارى بولدى، اۋىل شارۋاشىلىعى تەحنيكاسىن جاڭارتۋ دەڭگەيى 5،5%-عا دەيىن جەتكىزىلدى.
اتالعان كەزەڭدە تاماق ونىمدەرىنىڭ ءوندىرىسى 2،1%-عا ارتىپ، شامامەن 3 ترلن تەڭگەنى قۇرادى. اتاپ ايتقاندا، كەلەسىدەي يمپورتقا تاۋەلدى ءونىم تۇرلەرىنىڭ ءوسىمى بايقالدى، ىرىمشىك پەن سۇزبە 8،7%-عا، شۇجىق ونىمدەرى 4،1%-عا، سارى ماي 2،9%-عا جانە وسىمدىك مايى 12%-عا ءوستى.
«جىلدىڭ سوڭىنا دەيىن ءداندى داقىلداردى، مايلى داقىلداردى وڭدەۋ ەسەبىنەن جانە قانت ءوندىرۋ ەسەبىنەن وسى سالادا جوعارى كورسەتكىشتەرگە قول جەتكىزەمىز دەپ ويلايمىز. سالانىڭ دامۋ قارقىنىنىڭ تومەندەۋىنە جول بەرمەۋ ماقساتىندا كەلەسى جىلى كوكتەمگى ەگىس جانە ەگىن جيناۋ جۇمىستارىن قارجىلاندىرۋ كولەمى 700 ملرد تەڭگەگە، اۋىل شارۋاشىلىعى تەحنيكاسىنىڭ جەڭىلدەتىلگەن ليزينگى 200 ملرد تەڭگەگە جەتكىزىلەتىن بولادى. 1،9 ملن توننا مينەرالدى تىڭايتقىشتاردى ەنگىزۋ جانە ەليتالىق تۇقىمدار ۇلەسىن 10،5%-عا ۇلعايتۋ جوسپارلانۋدا»، — دەپ تولىقتىردى ۆيسە-مينيستر.
ونىڭ ايتۋىنشا، 1 جەلتوقسانعا رەسپۋبليكالىق بيۋدجەتتەن بولىنگەن قاراجاتتىڭ يگەرىلۋى 79%-دى قۇرادى. جىل سوڭىنا دەيىن قاراجات تولىق يگەرىلەتىن بولادى.