ەلىمىزدە اۋە بيلەتتەرىنىڭ باعاسى مەن قىزمەت كورسەتۋ ساپاسى سىن كوتەرمەيدى

رەيستەردى نەگىزسىز كەشىكتىرۋ سىندى ولقىلىقتار دا تۋريزم سالاسىنىڭ دامۋىنا كەدەرگى جاساپ تۇر.

بۇل تۋرالى بۇگىن ءماجىلىستىڭ جالپى وتىرىسىندا دەپۋتات ەلنۇر بەيسەنبايەۆ ۇكىمەت باسشىسىنىڭ اتىنا جولداعان دەپۋتاتتىق ساۋالىندا مالىمدەدى، دەپ حابارلايدى Almaty-akshamy.kz.

ترانسپورتتىق جۇيە رەتتەلمەگەندىكتەن، تۋريستەر ەلىمىزدىڭ بارلىق تابيعي سۇلۋلىعىنا كوز جەتكىزە المايدى. سوندىقتان ساياحاتشىلاردان تۇسەتىن شاعىمنىڭ كوبى اۋە جولدارىمەن جۇرۋگە قاتىستى.

ەۋروپانى ايتپاعاندا، ورتالىق ازيا جانە وزگە جەكەلەگەن مەملەكەتتەرمەن بايلانىستىراتىن حالىقارالىق تۋريستىك جۇيەنى قالىپتاستىرا المادىق، - دەيدى دەپۋتات. ال «جىبەك جولى» بويىنداعى تەمىرجول مارشرۋتتارىنىڭ ورنىن كورشىلەس وزبەكستان ءتيىمدى پايدالانىپ وتىر دەيدى

 «اۆتوكولىكپەن جۇرەتىن جولداردىڭ جاعدايى سىن كوتەرمەيتىنى تۋرالى دەپۋتاتتىق ساۋالداردىڭ سانىندا ەسەپ جوق. ءتىپتى، مەملەكەت باسشىنىڭ ءوزى بۇل ماسەلەنى شەشەتىن ۋاقىت جەتتى دەپ ۇكىمەتتى سۇيرەلەپ جۇرگەنىن بىلەمىز. ءبىر عانا مىسال، ەلىمىز بويىنشا ەڭ كەمىندە 4 مىڭ شاقىرىمنان اساتىن 166 باعىت بويىنشا اۆتوموبيل جولدارىن جوندەۋ مەن رەكونسترۋكسيالاۋ قاجەتتىلىگى انىقتالۋدا»،- دەيدى ق ر پارلامەنتى ءماجىلىسىنىڭ دەپۋتاتى ەلنۇر بەيسەنبايەۆ.

دەپۋتاتتىڭ بۇل ساۋالىنا قاتىستى ءماجىلىس ءتوراعاسى بۇل جاعدايدىڭ شىندىعىندا وزەكتى ەكەنىن ءارى قولدايتىنىن ايتتى. 

 «وزەكتى پروبلەمانى كوتەرىپ وتىر، ءبىز، شىنىندا دا، كوپتەگەن جىلدار بويى سەلقوس، جۇيەسىز جۇمىستىڭ ارقاسىندا كوپتەگەن پوزيسيامىزدى جوعالتىپ جاتىرمىز. كورشى مەملەكەتتەر الىپ كەتىپ جاتىر. سوندىقتان مەن قولدايمىن»،- دەدى ق ر پارلامەنتى ءماجىلىسىنىڭ ءتوراعاسى ەرلان قوشانوۆ.