تۇرعىلىقتى جەرى اۋىسقان كەزدە ازاماتتار اۆتوماتتى تۇردە جەرگىلىكتى اسكەري باسقارۋ ورگاندارىنا بەكىتىلەدى
قورعانىس مينيسترلىگى اسكەري مىندەتتىلەر مەن اسكەرگە شاقىرىلۋشىلاردىڭ سيفرلىق ەسەبىنە كوشتى، دەپ حابارلايدى اlmaty-akshamy.kz Azattyq Ruhy-نا سىلتەمە جاساپ.
قورعانىس مينيسترلىگىنىڭ باسپا ءسوز قىزمەتى حابارلاعانداي، بۇعان دەيىن بۇل يننوۆاسيانى زاڭنامالىق بەكىتۋ مەن ونى تەحنيكالىق ىسكە اسىرۋ جۇمىستارى جۇرگىزىلگەن بولاتىن.
«وسىلايشا، «ەلەكتروندىق ۇكىمەتتەن» مەملەكەتتىك باسقارۋدىڭ جاڭا فورماتى – «كورىنبەيتىن ۇكىمەتكە» كوشۋ جۇرگىزىلىپ جاتىر. ونىڭ ءمانى –شىعارىلعان شەشىمدەردىڭ اۋقىمى ازاماتتارعا كورىنبەيدى. مەملەكەتتىك ساياساتتىڭ نازارى ادامعا، ونىڭ قاجەتتىلىكتەرى مەن مۇددەلەرىنە باعىتتالعان»، - دەيدى ۆەدومستۆو وكىلدەرى.
اسكەري ەسەپكە الۋ سالاسىنداعى قىزمەتتەر كەشەنىن ەلەكتروندىق فورماتقا اۋىستىرۋ قورعانىس مينيسترلىگىنىڭ اقپاراتتىق جۇيەلەرىن باسقا مەملەكەتتىك ورگاندارمەن ىقپالداستىرۋدىڭ ارقاسىندا مۇمكىن بولىپ وتىر.
«ەندى كەلۋ ءتارتىبىن تالاپ ەتەتىن قىزمەتتەر سيفرلىق فورماتقا اۋىستىرىلدى. بەيبىت ۋاقىتتا اسكەرگە شاقىرۋ جاسىنداعى ازاماتتاردى تىركەۋ تۋرالى كۋالىكتەر مەن اسكەري قىزمەت وتكەرمەگەندەرگە اسكەري بيلەتتەر بەرۋ توقتاتىلدى. 17 جاستاعى جىگىتتەر ءۇشىن جەكە ىستەرىن جيناپ، اسكەري كوميسسارياتتارعا تىركەۋگە كەلۋدىڭ ەش قاجەتى جوق. قىزمەتتىڭ بۇل ءتۇرى جۇيەلەردەگى قولدا بار دەرەكتەر نەگىزىندە اۆتوماتتى تۇردە جۇزەگە اسىرىلادى»، – دەپ ناقتىلادى قارۋلى كۇشتەر باس شتابى ۇيىمداستىرۋ-جۇمىلدىرۋ جۇمىسى دەپارتامەنتى باستىعىنىڭ ورىنباسارى پولكوۆنيك رۋسلان وماروۆ.
بۇدان وزگە اسكەري مىندەتتىلەر مەن اسكەرگە شاقىرىلۋشىلاردىڭ ەلەكتروندىق ەسەبى ەنگىزىلدى. تۇرعىلىقتى جەرى اۋىسقان كەزدە ازاماتتار اۆتوماتتى تۇردە جەرگىلىكتى اسكەري باسقارۋ ورگاندارىنا بەكىتىلەدى.
«قىزمەتتەردى اۆتوماتتاندىرۋ ازاماتتاردى جۇمىسقا ورنالاستىرۋ ءتارتىبىن دە جەڭىلدەتەدى. جۇمىس بەرۋشىگە ەندى قىزمەتكەردەن اسكەري بيلەت نەمەسە تىركەۋ كۋالىگىن تالاپ ەتۋدىڭ قاجەتى جوق. بارلىق دەرەك ازاماتتىڭ Egov-تاعى جەكە كابينەتىنىڭ «اسكەري قىزمەت» بولىمىندە تۇر. ەگەر ونداعى مالىمەتتەر سايكەس كەلمەسە نەمەسە جەتكىلىكسىز بولسا، رەسۋرس پايدالانۋشىلارى جەكە كابينەت ارقىلى «مالىمەتتەردى وزەكتەندىرۋ/تۇزەتۋ» مەملەكەتتىك قىزمەتىن الۋعا ءوتىنىم بەرە الادى. وندا ءتيىستى قۇجاتتاردى قوسا بەرەدى»، - دەلىنگەن حابارلامادا.
زەينەتكەرلىككە شىققان كەزدە اسكەري قىزمەتتى وتكەرگەنىن راستايتىن انىقتاما الۋ ءۇشىن جەرگىلىكتى اسكەري باسقارۋ ورگانىنا جۇگىنۋ قاجەتتىلىگى دە جويىلدى.
قورعانىس، ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ دەرەكتەرىن بىرىكتىرۋدىڭ ارقاسىندا «جەڭىلدىكتەرى بار ادامدارعا (ۇلى وتان سوعىسىنىڭ ارداگەرلەرىنە، باسقا مەملەكەتتەردىڭ اۋماعىنداعى ۇرىس قيمىلدارىنا جانە چەرنوبىل اتوم ەلەكتر ستانسياسىنداعى اپات سالدارىن جويۋعا قاتىسۋشىلارعا) انىقتامالار بەرۋ» مەملەكەتتىك قىزمەتى دە الىنىپ تاستالدى.