ەلىمىزدىڭ قورعانىس ءمينيسترى جامبىل وبلىسىنداعى «ءماتىبۇلاق» پوليگونىندا «ارحو – 2021» كونكۋرستارىنا قاتىسۋشىلاردى قۇتتىقتادى.
قورعانىس مينيسترلىگىنىڭ دەرەگىنشە، گەنەرال-لەيتەنانت نۇرلان ەرمەكبايەۆ قازاقستان رەسپۋبليكاسىنىڭ اۋماعىندا وتەتىن ارميالىق حالىقارالىق ويىنداردى رەسمي تۇردە اشىق دەپ جاريالادى، دەپ حابارلايدى Almaty-akshamy.kz.
قورعانىس ۆەدومستۆوسىنىڭ باسشىسى كونكۋرستارعا قاتىسۋشىلار الدىندا سويلەگەن سوزىندە ارميالىق حالىقارالىق ويىنداردىڭ اۋقىمى كەڭ، ءىرى الەمدىك بىرىنشىلىكپەن ءبىر دەڭگەيدە ەكەنىن اتاپ ءوتتى.
«ارميالىق ويىندارداعى سايىستار – بۇل نىسانانى زاقىمداۋدا دالدىك پەن مەرگەندىكتى، ءارتۇرلى قارۋدى مەڭگەرۋدە شەبەرلىكتى، ءمىنسىز دەنە دايىندىعى مەن توزىمدىلىكتى، اسكەري تەحنيكانى باسقارۋداعى سەنىمدى داعدىلاردى كورسەتۋ. ويىندار اسكەري قىزمەتشىلەردى بەيتانىس جەردە، پسيحوەموسيونالدىق شيەلەنىس جاعدايىندا ارەكەت ەتۋگە ماجبۇرلەۋمەن دە قىزىقتى»، – دەپ اتاپ ءوتتى قورعانىس ءمينيسترى.
جەتى جىل ىشىندە ارميالىق حالىقارالىق ويىندارعا قاتىسۋشى ەلدەردىڭ سانى 17 مەملەكەتتەن 44-كە دەيىن ارتتى. سايىستار ءتۇرى دە كوبەيۋدە. كونكۋرستاردىڭ بارلىق كەزەڭى قاتىسۋشىلاردان كوماندا قۇرامىندا ارەكەت ەتۋ كەزىندە توزىمدىلىكتى، ەپتىلىكتى، دالدىك پەن شەبەرلىكتى تالاپ ەتەتىن قازىرگى زامانعى شىنايى ۇرىس جاعدايىنا بارىنشا جاقىنداتىلعان.
ارميالىق ويىنداردىڭ جاۋىنگەرلىك ماشىقتى ارتتىرۋداعى ماڭىزىن اتاپ وتكەن گەنەرال-لەيتەنانت نۇرلان ەرمەكبايەۆ:
«اسكەري قىزمەتشىلەر وقۋ-جاتتىعۋلار نەمەسە جارىستار ۋاقىتىندا ناقتى جانە ۇيلەسىمدى ارەكەت ەتسە، وندا ولاردىڭ كەمىندە 80%ء-ى جاۋىنگەرلىك جاعدايدا دا ءدال وسىلاي ارەكەت ەتەتىنىن ءوز ءىسىن جەتە مەڭگەرگەن كاسىبي اسكەريلەر جاقسى بىلەدى»، – دەدى.
بيىل جامبىل وبلىسىنداعى 40-ىنشى اسكەري بازانىڭ اۋماعىندا ارميالىق ويىنداردىڭ 2 كونكۋرسى – مينااتقىشتار ەسەپتوپتارى اراسىنداعى «ارتيللەريادان وق اتۋ شەبەرى» جانە ۇۇا ماماندارىنىڭ «سۇڭقار اڭشىلىعى» سايىستارى وتەدى. قازاقستان جاۋىنگەرلەرى اسكەري سايىستاردا ءاردايىم جوعارى ناتيجەلەر كورسەتىپ، وسى كونكۋرستاردا ۇدايى الدا بولىپ كەلەدى.
ويىندارعا قاتىسۋ ءۇشىن «ءماتىبۇلاق» پوليگونىنا 8 ەلدەن ارتيللەريستەر جانە 4 مەملەكەت ارمياسىنان ۇشقىشسىز ۇشۋ اپپاراتتارىنىڭ ەسەپتوپتارى كەلدى. كونكۋرستارعا 3 ەلدەن كەلگەن وكىلدەر باقىلاۋشى رەتىندە قاتىسادى.
«قازاقستان – بەيبىت ساياساتتى ۇستاناتىن مەملەكەت. وسىنداي جارىستاردىڭ ارقاسىندا ءبىز جاۋىنگەرلىك دايارلىقتىڭ كۇشتى جانە ءالسىز جاقتارىن ايقىنداپ، شەبەرلىكتى ودان ءارى شىڭداپ، ونىڭ تيىمدىلىگىن ارتتىرا الامىز. بۇل بەيبىت دامۋدى ماقسات ەتكەن بۇكىل ادامزات دامۋىنىڭ پروگرەسسيۆتى جولى. مۇندا اسكەري قىزمەتشىلەر ۇرىس دالاسىندا ەمەس، سپورت سايىستارىندا كۇش سىناسادى. الايدا، قازاقستان ارمياسى ەلدىڭ ەگەمەندىگى مەن قاۋىپسىزدىگىن قورعاۋعا قابىلەتتى دەپ سەنىممەن ايتا الامىن. دايارلىقتى جوعارى دەڭگەيدە ۇستاۋ ءۇشىن ارميالىق حالىقارالىق ويىندارعا دايىندىق بارىسىندا دا، ونى وتكىزۋ كەزىندە دە جاتتىعامىز»، – دەدى قورىتىندى سوزىندە گەنەرال-لەيتەنانت نۇرلان ەرمەكبايەۆ.
ەل اۋماعىندا ءوتىپ جاتقان ارميالىق حالىقارالىق ويىندار اعىمداعى جىلعى 2 قىركۇيەككە دەيىن جالعاسادى.