قازاقستاندا انيماسيالىق فيلمدەردىڭ ءوندىرىسى قارقىن الدى.
تەك بيىلدىڭ وزىندە مەملەكەت بۇنداي 8 جوبانىڭ ءتۇسىرىلىمىن قارجىلاندىرماق. ولاردىڭ قاتارىندا جاس رەجيسسەر ديلشات ءراحماتۋلليننىڭ تۋىندىسى بار. سوڭعى 11 جىلدىڭ ىشىندە عانا ونىڭ ستۋدياسىنان ونداعان مۋلتفيلم كورەرمەنگە جول تارتتى، دەپ حابارلايدى Almaty-akshamy.kz.
وتكەن كوكتەمدە «بەسىك جىرى» اتتى ەڭبەگى تۇركياداعى بايقاۋدا ۇزدىك انيماسيا دەپ تانىلدى. ال، 2023 جىلدىڭ سوڭىندا «اشينا. كوكتەگى قاسقىرلار تۋرالى اڭىز» اتتى جاڭا جۇمىستىڭ تۇساۋىن كەسۋ كوزدەلگەن.
«بۇل 3-د فورماتىندا تۇسىرىلگەن مۋلتفيلم. فيلم ورىس تىلىنە دۋبلياجدالىپ قازاق تىلىندە شىعادى. سونداي-اق، ءقازىر ءبىز تۇركيا، جالپى، تۇركىتىلدەس ەلدەر ونى ءوز تىلدەرىنە وزدەرى اۋداراتىنى جونىندە كەلىسسوزدەر جۇرگىزىپ جاتىرمىز. ساپا جاعىنان كورشى مەملەكەتتەردەگى ارىپتەستەردەن اسىپ تۇسپەسەك، كەم دۇنيە جاسامايمىز. ياعني باسەكەگە قابىلەتتى ءونىم. سوندىقتان، ماڭىمىزداعى ەلدەرگە پروكاتقا شىعۋىمىز ابدەن مۇمكىن»، - دەيدى انيماسيالىق فيلمدەردىڭ رەجيسسەرى ديلشات راحماتۋللين.
سونداي-اق، ەلوردالىق مەدياكومپانيانىڭ ەكى بىردەي جوباسى مەملەكەتتىك دەمەۋگە يە بولعان. ول ۇجىم ۇلتتىق كينونى قولداۋعا باعىتتالعان بايقاۋعا الماتى قالاسىنا ارنالعان كوركەم فيلم جانە «ەۆا. باتىر قىز» دەرەكتى تۋىندىسىن ۇسىندى. سوڭعىسى نازىك جاندىلارعا ءتان ەمەس ءداستۇرلى ۇلتتىق سپورت ءتۇرى - كوكپار ويىنىنا اۋەستەنىپ، ەر مىنەز تانىتىپ جۇرگەن الماتى تۇرعىنىنىڭ ءومىر جولى مەن جەتىستىكتەرىنەن سىر شەرتەدى.
«ەۆانىڭ بويىندا قورقىنىش سەزىمى جوق دەسەك بولادى. ەگەر ءسىز كورگەن بولساڭىز، كۇرت جوعارى كوتەرىلەتىن نەمەسە تومەن ءتۇسىپ كەتەتىن دوڭەس جەرلەر كوپ. ول ونى ات ۇستىندە شاۋىپ ءجۇرىپ باعىندىرا الادى. بۇل ەر-ازاماتتاردىڭ وزىندە ەكىنىڭ ءبىرىنىڭ قولىنان كەلە بەرمەيدى»، - دەيدى سەناريست-رەجيسسەر تەمىربەك امانجول.
بۇگىندە جوبانىڭ اۆتورلارى «ەۆا. باتىر قىز» ءفيلمىنىڭ ءبىر بولىگىن ءتۇسىرىپ ۇلگەرگەن. 2022 جىلى جابىق كورسەتىلىم ۇيىمداستىرۋ كوزدەلىپ وتىر. بۇل - شىعارماشىلىق توپتىڭ العاشقى ۇلكەن باستاماسى. جاڭا تۋىندىنى تۇسىرۋگە كەتكەن شىعىننىڭ 70%-ىن مەملەكەت وتەيدى. ايتا كەتەيىك، بيىل بيۋدجەتتەن وسى تەكتى 62 وتاندىق كينوجوبا قولداۋ تابادى.
«جالپى، بيىل جاريالاعان پيچينگكە 200-دەن استام ۇسىنىس كەلىپ ءتۇستى. 60 پايىزدان استامى، ياعني 70 پايىزعا جۋىعى - جاستاردىڭ جوبالارى. جالپى، قازاقستان كينوسىندا جاڭا بۋىننىڭ قالىپتاسقانىن وسىدان-اق بايقاۋعا بولادى. جاستار ءقازىر باتىل، تاۋەلسىز، ەركىن ويلى جاقىن ارادا ولار وزدەرىنىڭ وندىرىستەرىن باستايدى»، - دەيدى ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسىنىڭ ورىنباسارى ابزال مۇحيموۆ.
جاقىندا وتاندىق كينو ءوندىرىسى جاڭا دارىن يەلەرىمەن تولىعا تۇسپەك. ولاردى ەل عانا ەمەس، شەت مەملەكەتتەر دە تانيتىن بولادى. بيىل 20-عا تارتا ەلدە قازاقستاندىق كينو كۇندەرىن وتكىزۋ جوسپارلانىپ وتىر. بۇل تىزىمدە اقش، كانادا جانە گەرمانيا بار.