كولىك ۆيسە-مينيسترى ماقسات قالياقپاروۆ اقمولا وبلىسىنا ىس-ساپارمەن بارىپ، كوكشەتاۋ – زەرەندى تاسجولىنداعى ورتاشا جوندەۋ جۇمىستارىن تەكسەردى. اتالعان جول بويىندا ەلىمىزدە العاش رەت ريەۆەرسيۆتى قوزعالىس جولاعى سالىنادى.
جوبا اياسىندا جولدىڭ ەنى 7 مەتردەن 11 مەترگە دەيىن كەڭەيەدى، دەپ حابارلايدى aqshamnews.kz.
كولىك مينيسترلىگىنىڭ مالىمدەۋىنشە، جوندەۋ جۇمىستارى تولىق اياقتالعان سوڭ، ءۇش جولاقتى قوزعالىس جۇيەسى ىسكە قوسىلىپ، ونىڭ ءبىر جولاعى ريەۆەرسيۆتى بولادى. بۇل جولدىڭ وتكىزۋ قابىلەتىن ارتتىرىپ، جول-كولىك وقيعالارىن الدىن الۋعا مۇمكىندىك بەرمەك. اسىرەسە جازعى ماۋسىمدا قوزعالىس قارقىندىلىعى ارتقان كەزدە تۋريستەر مەن جەرگىلىكتى تۇرعىندار ءۇشىن بۇل جول ىڭعايلى ءارى ءقاۋىپسىز بولادى دەپ كۇتىلۋدە.
«جازعى ۋاقىتتا زەرەندى كۋرورتتىق ايماعىنا باراتىن كولىك سانى ارتاتىنى ءسوزسىز. جوندەۋ جۇمىستارى 47 شاقىرىمدى قامتيدى. ءقازىر جوبا اياسىنداعى جۇمىستار بەلگىلەنگەن كەستەگە ساي ءجۇرىپ جاتىر»، – دەدى ۆيسە-مينيستر.
زەرەندى كۋرورتتىق ايماعى – ەلىمىزدەگى ەڭ تانىمال تۋريستىك باعىتتاردىڭ ءبىرى. مۇندا جىل سايىن قازاقستاننىڭ تۇكپىر-تۇكپىرىنەن جانە الىس-جاقىن شەتەلدەردەن مىڭداعان تۋريست كەلىپ دەمالادى.
جالپى 2025 جىلى اۋقىمدى ورتاشا جوندەۋ باعدارلاماسى اياسىندا رەسپۋبليكالىق ماڭىزى بار 7 مىڭ شاقىرىم جول جاڭارتىلماق. بۇل جۇمىستار ەڭ الدىمەن تۋريستىك الەۋەتى جوعارى وڭىرلەرگە باعىتتالعان. اتاپ ايتقاندا، راحمانوۆ قاينارى، الاكول، قايىڭدى مەن كولساي كولدەرى، باياناۋىل، كەندىرلى، قورعالجىن قورىعى جانە يمانتاۋ-شالقار كۋرورتتىق ايماعىنا باراتىن جولدار. جوندەۋدەن وتەدى