ەكى ەل اراسىندا مادەنيەت كۇندەرىن وتكىزۋ ءبىرىڭعاي مادەني-اقپاراتتىق ىنتىماقتاستىقتى نىعايتۋعا، ەكىجاقتى قاتىناستاردى دامىتۋعا ىقپال ەتەتىنى ءسوزسىز. اتالعان ءىس-شارا ەكى ەل اراسىنداعى مادەني بايلانىستاردى ودان ءارى دامىتۋعا سەرپىن بەرەدى، دەپ حابارلايدى aqshamnews.kz.
قازاقستان رەسپۋبليكاسى مادەنيەت جانە اقپارات مينيسترلىگىنىڭ ۇيىمداستىرۋىمەن مادەني كۇندەر اياسىندا ءبىرقاتار ءىس-شارالار وتەدى.
18 ءساۋىر كۇنى ەريەۆان قالاسىنىڭ «ماسكەۋ» كينوتەاترىندا ساعات 16:00-دە قازاقستان كينوسىنىڭ اشىلۋى رەجيسسەر رۇستەم ءابدىراشوۆتىڭ قازاق حاندارى تۋرالى «قازاق حاندىعى. التىن تاق» اتتى تاماشا تۋىندىسىمەن باستالادى. ساعات 19:00-دە رەجيسسەر فارحات ءشارىپوۆتىڭ «توقتا، ءتۇن» ءفيلمى كورەرمەن نازارىنا ۇسىنىلادى.
19 ءساۋىر كۇنى اتالعان كينوتەاتردا ساعات 16:00-دە رەجيسسەر سەرىكبول وتەپبەرگەنوۆتىڭ «پاتريوتتار ۋاقىتى» ءفيلمى جانە 19:00-دە رەجيسسەر د. يبراگيموۆتىڭ «بۇركىت» ءفيلمى كورسەتىلەدى.
قازاقستان رەسپۋبليكاسىنىڭ ارمەنيا رەسپۋبليكاسىنداعى مادەني كۇندەرى اياسىندا وتەتىن نەگىزگى ءىس-شارا – 19 ءساۋىر كۇنى ساعات 19:00-دە ارام حاچاتۋريان اتىنداعى كونسەرت زالىندا جوسپارلانعان. وندا وتاندىق ونەرپازداردىڭ قاتىسۋىمەن گالا كونسەرت وتەدى. اتالعان ءىس-شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا مەن ارمەنيانىڭ ءبىلىم، عىلىم، مادەنيەت جانە سپورت ءمينيسترى جاننا اندرەاسيان، جەرگىلىكتى زيالى قاۋىمدار، عالىمدار، جازۋشىلار، ديپلوماتيالىق كورپۋستىڭ، شىعارماشىلىق وداقتاردىڭ، قازاق دياسپوراسىنىڭ وكىلدەرى قاتىسادى.
گالا-كونسەرتتە قازاقستاننىڭ حالىق ءارتىسى روزا رىمبايەۆا، قازاقستاننىڭ ەڭبەك سىڭىرگەن قايراتكەرلەرى الەكساندر بەلياكوۆ، ايگەرىم بەكەتايەۆا، «دارىن» مەملەكەتتىك جاستار سىيلىعىنىڭ لاۋرەاتتارى راسۋل جارماعامبەتوۆ، اسقار مۇقيات جانە باسقا دا ونەر جۇلدىزدارى تانىمال ەسترادالىق اندەر مەن حالىق كومپوزيتورلارىنىڭ شىعارمالارىن ورىندايدى.
قازاقستان رەسپۋبليكاسى مادەنيەت جانە اقپارات مينيسترلىگى جانە ارمەنيا رەسپۋبليكاسى مادەنيەت مينيسترلىگىنىڭ بىرىگىپ ۇيىمداستىرۋىمەن قازاقستان رەسپۋبليكاسىنداعى ارمەنيا رەسپۋبليكاسىنىڭ مادەني كۇندەرى 2024 جىلى قازان ايىندا استانا قالاسىندا وتكەن بولاتىن.