الماتى وبلىسىندا تازى مەن توبەت يتتەرىنىڭ كورمەسى ۇيىمداستىرىلدى، دەپ حابارلايدى Almaty-akshamy.kz Inform.kz-كە سىلتەمە جاساپ.
مەملەكەت باسشىسىنىڭ تاپسىرماسى اياسىندا «شوپان اتا» اگروقوزعالىسىنىڭ ءتوراعاسى الماسبەك سادىرباي جانە سۇلتان يبراگيموۆتىڭ ۇيىمداستىرۋىمەن «جەتى قازىنا» توبەت جانە تازى يت وسىرۋشىلەر قاۋىمداستىعى قۇرىلدى.
جاڭادان قۇرىلعان قاۋىمداستىقتىڭ ۇيىتقى بولۋىمەن الماتى وبلىسى قاراساي اۋدانى شامالعان اۋىلىندا تازى، توبەت يتتەر كورمەسى ءوتتى.
شارانىڭ ماقساتى - تازى مەن توبەت جاناشىرلارىنىڭ باسىن قوسىپ، بىرىكتىرۋ، ولاردىڭ تۇقىمىن ساقتاپ قالۋمەن قاتار، عىلىممەن ۇشتاستىرۋ ماسەلەلەرىن تالقىلاۋ جانە وسى ماسەلەگە سالا ماماندارىن تارتۋ.
ودان بولەك، ۇيىمداستىرۋشىلاردىڭ قازاقتىڭ تازىسى مەن توبەتىن تۇركىمەن الابايى سياقتى ۇلتتىق برەندكە اينالدىرىپ، تازى-توبەت ۇستاۋدى ەل اراسىندا كەڭىنەن ناسيحاتتاۋ ماقساتى بار.
قاۋىمداستىق قۇرىلتايشىسى الماسبەك سادىربايدىڭ ايتۋىنشا، تازى – جەتى قازىنانىڭ ءبىرى، ۇلتىمىزدىڭ قۇندىلىعى، بايلىعى.
ونىڭ تۇقىمىن ساقتاپ، بولاشاق ۇرپاققا جەتكىزۋ - قاۋىمداستىقتىڭ باستى ميسسياسى.
كورمەگە قاراعاندى، اقمولا، شقو، اباي، جامبىل وبلىستارىنان جانە رەسەيدەن قوناقتار كەلدى. سونداي-اق، شاراعا تازى مەن توبەت ءوسىرۋشى ەنتۋزياستار، ساراپشىلار مەن كينولوگتار قاتىستى.
ايتا كەتسەك، ۋكراينانىڭ حاركوۆ قالاسىنان كەلگەن يت ءوسىرۋشى دميتريي رايحبەرگ، توبەت تۋرالى عىلىمي ماقالالار اۆتورى ا.قوجاحمەتوۆ، ەكس-كينولوگ ۆلاديمير ۆلاديميروۆيچ، تازى ساراپشىسى ا.الپىسبايەۆ، س. يبراگيموۆ، پ.پەنكين، ماحامبەت سپابەكوۆ كورمە قوناعى بولدى.
ۇيىمداستىرۋشىلاردىڭ مالىمدەۋىنشە، پرەزيدەنت تاپسىرماسى اياسىندا العاش رەت ۇيىمداستىرىلعان كورمە جوعارى دارەجەدە ءوتتى.
الداعى ۋاقىتتا استانادا وتكىزۋ جوسپاردا بار.
