نەكە تۋرالى وزگەرىستەر.
ازاماتتىق حال اكتىلەرىن مەملەكەتتىك تىركەۋدى ۇيىمداستىرۋ، ازاماتتىق حال اكتىلەرى جازبالارىنا وزگەرىستەر ەنگىزۋ، قالپىنا كەلتىرۋ، جويۋ قاعيدالارىنا وزگەرىستەر ەنگىزىلدى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
قۇجات بويىنشا، ەندى ازاماتتىق حال اكتىلەرىن تىركەۋ قىزمەتىن الۋ ءۇشىن ازاماتتار جەكە باسىن كۋالاندىراتىن قۇجاتتىڭ ەلەكتروندى نۇسقاسىن ۇسىنا الادى.
دالىرەك ايتساق، نەكەنى تىركەۋ، نەكە جاسىن تومەندەتۋ، نەكەنى بۇزۋ، 16 جاسقا دەيىنگى بالالارعا تۋۋ تۋرالى قايتالاما كۋالىكتەردى بەرۋ، تۋۋدى تىركەۋ، ءاتى-جونىن وزگەرتۋدى تىركەۋ، ازاماتتىق حال اكتىلەرى جازبالارىن قالپىنا كەلتىرۋ جانە جويۋ، ازاماتتىق حال اكتىلەرىن تىركەۋ تۋرالى قايتالاما كۋالىكتەردى نەمەسە انىقتامالاردى بەرۋ راسىمدەرى ەلەكتروندى جەكە كۋالىك ارقىلى دا ىسكە اسىرىلادى.
«نەكەگە تۇرۋعا نيەت بىلدىرگەن ادامدار نەكە قيۋدى (ەرلى-زايىپتى بولۋدى) تىركەۋدىڭ بەلگىلەنگەن كۇنى جەكە باستى كۋالاندىراتىن قۇجاتپەن نەمەسە سيفرلىق قۇجاتتار سەرۆيسىنەن ەلەكتروندىق قۇجاتپەن تىركەۋشى ورگانعا كەلۋى قاجەت. ەگەر نەكەگە وتىرۋعا (ەرلى-زايىپتى بولۋعا) تىلەك بىلدىرۋشىلەر دالەلدى سەبەپتەرمەن بەلگىلەنگەن كۇنى تىركەۋشى ورگانعا كەلە الماسا، نەكە قيۋدى (ەرلى-زايىپتى بولۋدى) مەملەكەتتىك تىركەۋ مەرزىمى ولاردىڭ ءوتىنىشى بويىنشا باسقا ۋاقىتقا اۋىستىرىلادى. بەلگىلەنگەن كۇنى نەكەگە (ەرلى-زايىپتىلىققا) وتىراتىن ادامدار نە ولاردىڭ بىرەۋى دالەلسىز سەبەپتەرمەن كەلمەگەن جانە نەكەنى (ەرلى-زايىپتىلىقتى) تىركەۋ مەرزىمىن ۇزارتا وتىرىپ، ءوتىنىش تۋرالى ارىز بولماعان جاعدايدا ءوتىنىش جويىلۋى ءتيىس»، - دەلىنگەن بۇيرىقتا.
نەكەنى بۇزعىسى كەلەتىن ەرلى-زايىپتىلار تىركەۋشى ورگانعا جەكە باسىن كۋالاندىراتىن قۇجاتپەن نەمەسە بەلگىلەنگەن كۇنى سيفرلىق قۇجاتتار سەرۆيسىنەن الىنعان ەلەكتروندىق قۇجاتپەن كەلۋى كەرەك.
«نەكەنى (ەرلى-زايىپتىلىقتى) بۇزعىسى كەلەتىن ەرلى-زايىپتىلار نەكەنى (ەرلى-زايىپتىلىقتى) بۇزۋدى تىركەۋ ءۇشىن بەلگىلەنگەن كۇنى جەكە باسىن كۋالاندىراتىن قۇجاتپەن نەمەسە سيفرلىق قۇجاتتار سەرۆيسىنەن ەلەكتروندىق قۇجاتپەن تىركەۋشى ورگانعا كەلۋى قاجەت. جۇرگىزىلگەن تەكسەرۋ ناتيجەلەرى بويىنشا لاۋازىمدى تۇلعا دەرەكتەردى ازاماتتىق حال اكتلەرىن جازۋدىڭ اقپاراتتىق جۇيەسىنە ءوتىنىش بەرىلگەن كۇننەن باستاپ 1 (ءبىر) اي وتكەننەن كەيىن ەرلى-زايىپتىلاردىڭ ەكەۋىنىڭ قاتىسۋىمەن ەنگىزەدى»، - دەپ جازىلعان قۇجات ماتىنىندە.
بۇل بۇيرىق 2021 جىلعى 5 قىركۇيەكتەن باستاپ كۇشىنە ەنەدى.