بۇل سالا – مەملەكەتىمىزدىڭ قارجى-ەكونوميكالىق ءال-اۋقاتىنىڭ كەپىلى.
بۇل تۋرالى ق ر يندۋستريا جانە ينفراقۇرىلىمدىق دامۋ ۆيسە-مينيسترى مارات قارابايەۆ Astana Mining & Metallurgy-2022 اياسىندا وتكەن ءىىى قازاقستاننىڭ التىن وندىرۋشىلەرىنىڭ فورۋمىندا ايتتى، دەپ حابارلايدى Almaty-akshamy.kz.
القالى باسقوسۋدا ەلىمىزدىڭ تاۋ-كەن كەشەنى سالاسىنا ينۆەستورلاردى تارتۋ ءۇشىن زاڭنامانى جەتىلدىرۋ، قۇندى مەتالدار نارىعى سالاسىن قولداۋ بويىنشا الەمدە قالىپتاسقان ۇردىستەر، سالىقتىق جەڭىلدىكتەر مەن ارتىقشىلىقتار، التىن ءوندىرۋ جوبالارىنىڭ ينۆەستيسيالىق تارتىمدىلىعىن ارتتىرۋ ءۇشىن سالىق رەجيمدەرىن قولايلى ەتۋگە ىقپال ەتۋ ماسەلەلەرى جان-جاقتى تالقىلاندى.
مارات قارابايەۆ ءوز سوزىندە قازاقستاندىق التىن ءوندىرىسى سالاسىنىڭ ستراتەگيالىق ماڭىزدىلىعىنا توقتالدى. ونىڭ ايتۋىنشا، بۇل سالا – مەملەكەتىمىزدىڭ قارجى-ەكونوميكالىق ءال-اۋقاتىنىڭ كەپىلى.
«ەلىمىزدە 400 توننادان استام التىن قورى بار. قازاقستان التىن قورى بويىنشا الەمدە ون ەكىنشى ورىندا. ءبىزدىڭ التىن وندىرۋشىلەر ەلىمىزدىڭ ەكونوميكالىق تۇراقتىلىعىن ساقتاۋعا ايتارلىقتاي ۇلەسىن قوسىپ وتىر. بۇل مەملەكەت پەن بيزنەستىڭ ءوزارا ىقپالداستىعىنىڭ ناتيجەسىندە قول جەتكىزىلدى. ءوز كەزەگىندە «باعالى مەتالدار مەن اسىل تاستار تۋرالى» جاڭا زاڭ دا سالانىڭ دامۋىنا تىڭ سەرپىن بەرگەنىن اتاپ ءوتۋ كەرەك. اتالعان زاڭ التىن ءوندىرۋدىڭ بارلىق كەزەڭىن ەلىمىزدە جۇزەگە اسىرۋعا مۇمكىندىك بەردى»، – دەدى ۆيسە-مينيسترى.
وسى رەتتە ايتا كەتەيىك، وتكەن جىلى قازاقستاندا 33 ملن توننا كەن جانە 66 توننا تازارتىلعان التىن وندىرىلگەن.
قازىرگى كۇندە ەلىمىزدە 3 التىن تازارتۋ زاۋىتى جۇمىس ىستەيدى. ونىڭ ەكەۋى لوندون مەتالل بيرجاسىنىڭ Good Delivery ستاتۋسىنا يە. بۇل – قازاقستاندىق التىن قۇيماسىنىڭ الەمدىك دەڭگەيدە مويىندالعانىنىڭ ايقىن نىشانى.
مارات قارابايەۆتىڭ ايتۋىنشا، قازاقستاننىڭ رەسۋرستىق بازاسىنىڭ ايتارلىقتاي كەڭدىگى – سالانىڭ وندىرىستىك قۋاتتىلىعىن ۇلعايتۋعا زور مۇمكىندىك بەرەدى. ماسەلەن، بۇگىنگى تاڭدا 1 ترلن تەڭگە قارجى تارتا وتىرىپ جىل سايىن 12 توننا ارفينارلىق التىن شىعارۋ الەۋەتى بار جانە 2 600 تۇراقتى جۇمىس ورنىن قامتيتىن11 جوبانى ىسكە اسىرۋ جوسپارلانىپ وتىر. ءوز كەزەگىندە بۇل باستاما ەلىمىزدىڭ الەۋمەتتىك-ەكونوميكالىق سالاسىنىڭ دامۋىنا تىڭ سەرپىن بەرمەك.