الماتى اكادەمياسىنىڭ تىڭداۋشىلارى ىمداۋ ءتىلىن ۇيرەنە باستادى

بۇل الەۋمەتتىك تۇرعىدا اكادەميا تىڭداۋشىلارىنىڭ مۇمكىندىگى شەكتەۋلى ازاماتتارمەن ءىس-قيمىل الگوريتمىن قۇرۋلارىنا مۇمكىندىك بەرەدى.

ق ر ءىىم م.ەسبولاتوۆ اتىنداعى الماتى اكادەمياسى – “KZ-2050 ۇلتتىق جوبالاۋ كەڭسەسىندە” جوبالىق مەنەدجمەنتتى دامىتۋ جوبالارىن جۇزەگە اسىرىپ جاتقان جالعىز وقۋ ورنى.

مەملەكەت باسشىسى قاسىم-جومارت توقايەۆتىڭ پوليسيانى باعالاۋ ولشەمدەرىن تۇبەگەيلى وزگەرتۋ، پوليسيا قىزمەتىنىڭ سەرۆيستىك مودەلىن ودان ءارى دامىتۋ جونىندەگى مىندەتتەرىن ورىنداۋ بارىسىندا ىشكى ىستەر ءمينيسترىنىڭ تاپسىرماسىمەن م.ەسبولاتوۆ اتىنداعى الماتى اكادەمياسىندا بيىلدان باستاپ ءبىرىنشى رەت مۇمكىندىگى شەكتەۋلى جاندارعا كومەكتەسۋ ماقساتىندا ىمداۋ ءتىلىن ۇيرەتۋدى كوزدەگەن جاڭا كەيس اشىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

سەبەبى قىزمەتتىك مىندەتتەرىن اتقارۋ بارىسىندا پوليسيا قىزمەتكەرلەرى ىمداۋ تىلىنە مۇقتاج جاندارمەن دە ءجيى بەتپە-بەت كەلەدى.

سوندىقتان دا اكادەميانىڭ وقۋ پروسەسىنە ىمداۋ ءتىلىن وقىتۋ باعدارلاماسى ەنگىزىلىپ، بۇگىندە كۋرسانتتارعا مۇمكىندىگى شەكتەۋلى ادامدارمەن قارىم-قاتىناس جاساۋعا مۇمكىندىك بەرەتىن ساباقتار وتكىزىلۋدە.

ولارعا ەڭ الدىمەن، “قايىرلى كۇن”، “سالەمەتسىز بە؟”، “قۇجاتتارىڭىزدى كورسەتىڭىز”، “سىزگە قانداي كومەك كەرەك؟” دەگەن سياقتى سوزدەردى ىممەن ءتۇسىندىرۋ ۇيرەتىلدى.