قازاقستاندا 15،5 تەكشە شاقىرىم مولشەرىندە سۋ قورى بار 3 692 اۋىز سۋ ورنى بارلاندى.
بۇل شارۋاشىلىقتى جانە تۇرعىنداردى اۋىز سۋمەن قامتاماسىز ەتۋ ءۇشىن قاجەت. بۇل رەتتە، ەلىمىزدە جىلىنا شارۋاشىلىق – اۋىز سۋ قاجەتتىلىكتەرى ءۇشىن 1 تەكشە شاقىرىمنان ءسال ارتىق سۋ الىنادى.
سۋ كودەكسىنىڭ قولدانىستاعى رەداكسياسىنا سايكەس اۋىز سۋ كوزدەرى قورىن ساقتاۋ لاستانۋدان جانە بىتەلۋدەن قورعالعان جەراستى سۋ وبەكتىلەرىنىڭ بازاسىندا جۇزەگە اسىرىلادى.
«بۇل اۋىز سۋ قورى تىرشىلىك ءنارى جەتىسپەگەن جاعدايدا قاجەت بولادى. ءبىز جەر استى سۋلارىن زەرتتەۋگە كوپ كوڭىل بولەمىز. مىسالى، مەملەكەت باسشىسىنىڭ تاپسىرماسى شەڭبەرىندە گيدروگەولوگيالىق جۇمىستاردى ۇيىمداستىرۋ جانە جەر استى سۋ رەسۋرستارىنا مەملەكەتتىك باقىلاۋ مەن مونيتورينگ جۇرگىزۋ جونىندەگى قىزمەت قۇرىلاتىن بولادى. سونداي-اق ق ر ونەركاسىپ جانە قۇرىلىس مينيسترلىگى گەولوگيا كوميتەتىنىڭ جەر استى سۋلارى بويىنشا فۋنكسيالارىنىڭ ءبىر بولىگى ءبىزدىڭ مينيسترلىكتىڭ قۇزىرەتىنە وتەدى»، – دەدى ق ر سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.