مىڭنان استام تەكسەرۋ ءجۇردى
بيىل ونەركاسىپتەردەگى قاۋىپسىزدىك شاراسىن باقىلاۋ ماقساتىندا 1 مىڭنان استام تەكسەرۋ ءجۇردى. ناتيجەسىندە 20 مىڭنان استام وندىرىستىك قاۋىپسىزدىك تالاپتارىنىڭ بۇزىلۋ جاعدايى انىقتالدى. بۇل تۋرالى ق ر توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتىنىڭ ءتوراعاسى نىعمەدجان ماقاجانوۆ ءمالىم ەتتى، دەپ حابارلايدى Almaty-akshamy.kz.
«سوڭعى 5 جىلداعى تالداۋ ناتيجەسى كورسەتكەندەي، وندىرىستىك جاراقات الۋ نەگىزىنەن كومىر جانە تاۋ-كەن سالاسىنا تيەسىلى. بۇل رەسپۋبليكا بويىنشا ءقاۋىپتى وندىرىستىك وبەكتىلەردەگى جازاتايىم وقيعانىڭ 30%-دان استامىن قۇرايدى. سوندىقتان دا ونەركاسىپتەردەگى قاۋىپسىزدىك شاراسى كۇشەيتىپ، قۇقىقتىق ءتارتىپتى نىعايتۋ بويىنشا جۇمىستى جالعاستىرۋ قاجەت»، - دەيدى ول.
ونىڭ ايتۋىنشا، بيىل جىل باسىنان بەرى ونەركاسىپ ورىندارىندا 1 306 تەكسەرۋ جۇرگىزىلدى.
«ونىڭ ىشىندە ەرەكشە ءتارتىپ بويىنشا 713 جانە 593 جوسپاردان تىس تەكسەرۋ ءجۇردى. وسىلايشا بارلىعى 16 385 وبەكت تەكسەرۋدەن ءوتتى. ينسپەكتورلاردىڭ مىندەتى ونەركاسىپتىك قاۋىپسىزدىك تالاپتارىن بۇزۋ جاعدايلارىن انىقتاۋ. سونىمەن قاتار ءقاۋىپتى وندىرىستىك وبەكتىلەردە اپاتتىڭ الدىن الۋ. تەكسەرۋ قورىتىندىسىندا ونەركاسىپتىك قاۋىپسىزدىك تالاپتارىن بۇزۋ بويىنشا 20 402 فاكتى انىقتالدى»، - دەيدى ول.