الماتىلىق دارىگەرلەر تۇقىم قۋالايتىن اۋرۋعا شالدىققان 9 بالاعا كۇردەلى ميكروحيرۋرگيالىق وپەراسيا جاسادى
الماتىداعى №2 قالالىق كلينيكالىق بالالار اۋرۋحاناسىندا رەسەيلىك ميكروحيرۋرگ اندرەي ۆايتينگەردىڭ قاتىسۋىمەن ەكى كۇندىك شەبەرلىك كلاسى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
شەبەرلىك كلاسى شەڭبەرىندە پاسيەنتتەر بىلىكتى دارىگەرلەرلەردەن كەڭەس الدى. ەڭ باستىسى، مۋكوپوليساحاريدوز اۋرۋىمەن اۋىراتىن 9 بالاعا مىندەتتى الەۋمەتتىك مەديسينالىق ساقتاندىرۋ ەسەبىنەن وپەراسيا جاسالدى.
بىرەگەي كۇردەلى وتالاردى رەسەيلىك مامانمەن بىرگە №2 قالالىق كلينيكالىق بالالار اۋرۋحاناسىنىڭ تراۆماتولوگيا جانە ورتوپەديا بولىمشەسى مەڭگەرۋشىسى ەرلان سادىربالين مەن بالالار حيرۋرگى ۇلجان سولتانبەكوۆا جاسادى.
«وپەراسيالاردىڭ ءبارى شاعىن ءينۆازيۆتى ادىسپەن جاسالدى. ارنايى قۇرالداردىڭ كومەگىمەن جاسالعان حيرۋرگيالىق مانيپۋلياسيا ساۋساقتاردىڭ قوزعالىسىن قالپىنا كەلتىرۋگە مۇمكىندىك بەرەدى. بىرەگەي وپەراسيالاردى جاساۋ ارقىلى ءبىز دە الداعى ۋاقىتتا كادەگە جارايتىن ۇلكەن تاجىريبە جيناقتادىق»، - دەدى ەرلان سادىربالين.
مۋكوپوليساحاريدوز – اعزادا گليكوزامينوگليكانداردىڭ جيناقتالۋى سالدارىنان بولاتىن تۇقىم قۋالايتىن اۋرۋ. دانەكەر تىندەردى زاقىمدايتىن دەرت سالدارىنان جۇيكە جۇيەسى، كوزى، ىشكى ورگاندارى مەن قيمىل-قوزعالىس اپپاراتىنىڭ جۇمىسى بۇزىلادى. مۋكوپوليساحاريدوز - الەمدە 100 مىڭ ادامنىڭ 50-ىندە كەزدەسەتىن سيرەك (ورفاندىق) اۋرۋ.
ەستەرىڭىزگە سالا كەتسەك، ەلىمىزدە 18 جاسقا دەيىنگى بالالار مەملەكەت تاراپىنان ساقتاندىرىلادى.