بيزنەستى قولداۋدىڭ ايماقتىق باعدارلاماسى ىسكە قوسىلماق
قاراعاندىدا ق ر پرەمەر-مينيسترىنىڭ ورىنباسارى ەرالى توعجانوۆتىڭ توراعالىعىمەن حالىقتىڭ تابىسىن 2025 جىلعا دەيىن ارتتىرۋ باعدارلاماسىن ىسكە اسىرۋ بويىنشا كەڭەس ءوتتى. وعان ورتالىق مەملەكەتتىك ورگانداردىڭ، دامۋ ينستيتۋتتارىنىڭ، ءىرى ونەركاسىپتىك كاسىپورىنداردىڭ، شاعىن جانە ورتا بيزنەستىڭ وكىلدەرى قاتىستى، دەپ حابارلايدى Almaty-akshamy.kz Inform.kz-كە سىلتەمە جاساپ.
- باعدارلاما ەڭ الدىمەن حالىقتىڭ تابىسىن ارتتىرۋعا جانە ناتيجەلى جۇمىسپەن قامتاماسىز ەتۋگە باعىتتالعان. جالپى، وڭدەۋ ونەركاسىبىندە 126 مىڭنان استام جاڭا جۇمىس ورنىن قۇرۋمەن 713 جوبا ىسكە اسىرىلاتىن بولادى. 50 ءىرى كاسىپورىننىڭ اينالاسىندا شاعىن جانە ورتا بيزنەس بەلدەۋلەرى قۇرىلادى، بۇل كاسىپكەرلىك سۋبەكتىلەرىنىڭ كىرىستەرىن ارتتىرۋعا، تاۋارلاردى كەپىلدى وتكىزۋگە، ونىمدىلىكتى ارتتىرۋعا مۇمكىندىك بەرەدى، - دەدى ەرالى توعجانوۆ.
وتىرىس بارىسىندا يندۋستريا جانە ينفراقۇرىلىمدىق دامۋ ۆيسە-مينيسترى مارات قارابايەۆ ءاربىر باعىت بويىنشا تولىعىراق باياندادى. ونىڭ ايتۋىنشا، جىل باسىنان بەرى ءبىرقاتار ءىرى كومپانيا مەن ونەركاسىپتىك كاسىپورىندار جۇمىسشىلاردىڭ جالاقىسىن ورتا ەسەپپەن 20%-عا ارتتىردى.
2022 جىلى رەسپۋبليكادا 165 ينۆەستيسيالىق جوبانى ىسكە اسىرۋ ەسەبىنەن 16،3 مىڭ جاڭا جۇمىس ورنىن قۇرۋ جوسپارلانۋدا. جۇمىسپەن قامتۋ كورسەتكىشىنىڭ ەڭ كوپ ءوسىمى قاراعاندى، شىعىس قازاقستان جانە پاۆلودار وبلىستارىندا بولادى دەپ كۇتىلۋدە. اۋىلدىق جەرلەردە 2025 جىلعا دەيىن 52،4 مىڭ، مونوقالالاردا 11،1 مىڭ جاڭا جۇمىس ورنىن قۇرۋ جوسپارلانۋدا. مىسالى، ساران قالاسىندا باعدارلاما شەڭبەرىندە التى جوبانى ىسكە قوسۋ ەسەبىنەن شامامەن 2،5 مىڭ جۇمىس ورنى اشىلادى. مونوقالادا اۆتوبۋستار مەن جۇك كولىكتەرى، شينالار وندىرۋدەن باسقا، ينۆەستورلار تۇرمىستىق تەحنيكا شىعارۋعا نيەتتى.
بولجام بويىنشا، ەلىمىزدە مەتاللۋرگ، تەحنولوگ، حيميك، وپەراتور، ماشينيست جانە ت.ب. ماماندىقتار بويىنشا 75 مىڭنان استام جاڭا جانە جوعارى بىلىكتى جۇمىس ورىندارى پايدا بولادى. ونەركاسىپتى دامىتۋ قورى وڭدەۋ ونەركاسىبىنىڭ جوبالارىن جەڭىلدىكتى شارتتارمەن: شوب ءۇشىن - 10 جىلعا دەيىنگى مەرزىمگە 3% مولشەرلەمە بويىنشا؛ كاسىپورىنداردىڭ بارلىق تۇرلەرى ءۇشىن - 20 جىلعا دەيىنگى مەرزىمگە 7% مولشەرلەمە بويىنشا قارجىلاندىراتىن بولادى. كەڭەستە سونداي-اق وڭىرلىك كىرىستەردى ارتتىرۋ باعدارلامالارى دا ءسوز بولدى.
قاراعاندى وبلىسى اكىمىنىڭ ورىنباسارى ەرمەك الپىسوۆتىڭ ايتۋىنشا، ءىرى كومپانيالاردىڭ اينالاسىندا 637 شاعىن جانە ورتا بيزنەس كاسىپورىندارىنىڭ بەلدەۋى قۇرىلعان. وڭىردە 46 ينۆەستيسيالىق جوبا جۇزەگە اسىرىلۋدا، الەۋمەتتىك كاسىپكەرلىك دامۋدا. بيزنەستى قولداۋدىڭ ايماقتىق باعدارلاماسىن ىسكە قوسۋ جوسپارلانۋدا. جاڭا كاسىپتەر اتلاسى ازىرلەنۋدە، بۇل كادرلار ماسەلەسىن شەشۋگە مۇمكىندىك بەرەدى. كەڭەس قورىتىندىسى بويىنشا ە.توعجانوۆ ءبىرقاتار تاپسىرمالار بەردى. ءاربىر ءىرى كاسىپورىننىڭ ءوڭىر حالقىنىڭ تابىسىن ارتتىرۋعا اسەرىن باعالاۋ ينديكاتورلارىن ايقىنداۋ قاجەت. جوعارى قايتا وڭدەلگەن تاۋارلار وندىرەتىن جانە يمپورتتى الماستىرۋدى قامتاماسىز ەتەتىن كاسىپورىندار ءۇشىن ىنتالاندىرۋلار ەنگىزىلەتىن بولادى.
ءوز كەزەگىندە، مەملەكەتتىك قولداۋعا جاۋاپ رەتىندە كاسىپورىندار قارسى مىندەتتەمەلەر الۋى ءتيىس. ۆيسە-پرەمەر باعدارلامانى ىسكە اسىرۋ تۇراقتى باقىلاۋدا ەكەنىن اتاپ ءوتتى. جوبالىق كەڭسە اياسىندا مونيتورينگ اي سايىن جۇرگىزىلەدى.