شەتەلدىك جۇمىس كۇشى قۇرىلىس سالاسىنا كوپ تارتىلىپتى.
1 قىركۇيەكتەگى مالىمەت بويىنشا، جەرگىلىكتى اتقارۋشى ورگانداردىڭ رۇقساتىمەن قازاقستان اۋماعىندا 15 524 شەتەل ازاماتى ەڭبەك ەتەدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
شەتەلدىك جۇمىس كۇشىن تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن – 594 رۇقسات (ءبىرىنشى سانات)، قۇرىلىمدىق بولىمشەلەردىڭ باسشىلارى ءۇشىن – 3 901 رۇقسات (ەكىنشى سانات).
ەڭبەككە تارتىلعان شەتەلدىك جۇمىس كۇشىنىڭ نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە 8 894 جانە 911 ادام.
سونداي-اق ماۋسىمدىق جۇمىستارعا 1 430 ادام، ال كورپوراتيۆتىك اۋىستىرۋ اياسىندا 1 604 ادام تارتىلدى.
«قازىرگى ۋاقىتتا قازاقستاندا شەتەلدىك جۇمىس كۇشىن پايدالاناتىن 1 748 جۇمىس بەرۋشى بار. ولاردا 400 مىڭنان استام قازاقستان ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ 96%-ىن قۇرايدى»، - دەلىنگەن حابارلامادا.
ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر:
قۇرىلىس سالاسىندا – 6 139 ادام (40%)؛
تاۋ-كەن ونەركاسىبى جانە كارەرلەردى قازۋ – 1 489 ادام (10%)؛
اۋىل، ورمان جانە بالىق شارۋاشىلىعى – 1 256 ادام (8%)؛
كاسىبي، عىلىمي جانە تەحنيكالىق قىزمەت – 1 158 ادام (8% )؛
وڭدەۋ ونەركاسىبى – 1 154 ادام (8%).
ۆەدومستۆو اقپاراتى بويىنشا، ەڭبەك ميگرانتتارى نەگىزىنەن قىتايدان – 3 576 ادام، ءۇندىستاننان – 1 740 ادام، تۇركيادان – 1 701 ادام، وزبەكستاننان – 1 535 ادام، ۇلىبريتانيادان – 1 127 ادام كەلگەن.
ىشكى ەڭبەك نارىعىن قورعاۋ ماقساتىندا ەڭبەك مينيسترلىگى جىل سايىن رەسپۋبليكاعا شەتەل ماماندارىن تارتۋعا كۆوتا بەلگىلەيدى جانە بولەدى. وسى جىلعى قاڭتاردا ءىرى وتاندىق بيزنەس وكىلدەرىمەن كەزدەسۋ قورىتىندىسى بويىنشا پرەزيدەنتتىڭ بەرگەن تاپسىرماسىن ورىنداۋ ءۇشىن مينيسترلىك شەتەل جۇمىس كۇشىن تارتۋعا ارنالعان كۆوتانى بۇرىن جوسپارلانعان 28 352 بىرلىكتەن 23 560 بىرلىككە دەيىن، ياعني 4 792 ادامعا (16%) قىسقارتتى.