باتىس قازاقستان وبلىسىندا 28 ملن تەكشە مەتر سۋ جينايتىن جالپاقتال سۋ قويماسىن سالۋ جوسپارلانىپ وتىر.
بۇل 12 مىڭنان استام ادامدى سۋمەن قامتاماسىز ەتۋگە جانە ليماندى سۋارۋ الاڭىن 12 مىڭ گەكتارعا ۇلعايتۋعا مۇمكىندىك بەرەدى. ءوز كەزەگىندە بۇل مال شارۋاشىلىعىنا قاجەت جەم-شوپ ونىمدىلىگىن ارتتىرادى، دەپ حابارلايدى aqshamnews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا جەرگىلىكتى «قازسۋشار» فيليالى ديرەكتورىنىڭ مىندەتىن اتقارۋشى راۋان حۋساينوۆ حابارلادى.
بيىل «قازسۋشار» فيليالى باتىس قازاقستان وبلىسىندا 146 مىڭ گا ليمان مەن تابيعي جايىلىمدى سۋارۋعا 562 ملن تەكشە مەتر سۋ جىبەردى.
بۇگىنگى تاڭدا مەكەمە تۇتىنۋشىلارمەن سۋ بەرۋ تۋرالى 210 كەلىسىمشارت جاسادى، ونىڭ 197ء-ى جەرگىلىكتى شارۋالار. اۋىل شارۋاشىلىعىنىڭ قاجەتتىلىكتەرى ءۇشىن كاسىپورىن 15،8 ملن تەكشە مەتر، ال سانيتارلىق-ەكولوگيالىق ءىس–شارالارعا 22،9 ملن تەكشە مەتر سۋ جىبەردى.
«بقو بويىنشا «قازسۋشار» فيليالى 13 گيدروتەحنيكالىق قۇرىلىستى جوندەپ، كيروۆ سۋ قويماسىن رەكونسترۋكسيالاۋ جۇمىسىن جۇرگىزدى. سونداي – اق، شاعان وزەنى، كوشىم ماگيسترالدىق ارناسى مەن 67،6 شاقىرىم كانالدى مەحانيكالىق ادىسپەن تازالادى»، - دەدى بقو بويىنشا «قازسۋشار» فيليالى ديرەكتورىنىڭ مىندەتىن اتقارۋشى راۋان حۋساينوۆ.