ۆاكسينا قازان ايىنا دەيىن جەتەدى.
بۇدان كەيىن تەگىن ەكپە ءۇشىن شەتەلدىك ۆاكسينالار ساتىپ الىنبايدى، دەپ حابارلايدى Almaty-akshamy.kz
قاراعاندى فارماسيەۆتيكالىق كومبيناتىندا رەسەيلىك «سپۋتنيك V» ۆاكسيناسىن شىعارۋ جۇمىسى توقتاتىلدى. بۇل تۋرالى دەنساۋلىق ساقتاۋ ۆيسە-مينيسترى – باس مەملەكەتتىك سانيتار دارىگەر ايجان ەسماعامبەتوۆا مالىمدەدى.
باس سانيتاردىڭ ايتۋىنشا، قازىرگى كەزدە قازاقستاندا 4 ميلليون دوزادان استام ۆاكسينا بار. اتاپ ايتقاندا، قىتايلىق Sinopharm ۆاكيناسىنىڭ 1،8 ميلليون دوزاسى، Pfizer - 1،5 ميلليون، سونداي-اق QazVac-تىڭ 800 مىڭ ەكپەسى ساقتاۋلى تۇر.
«بۇنىڭ ءبارى ۆاكسينالاۋ مەن ريەۆاكسينالاۋعا تولىعىمەن جەتەدى. سول سەبەپتى قوسىمشا ۆاكسينا ساتىپ الۋدىڭ قاجەتى جوق. ءبىز ەكپەلەردى سالۋ شارالارىن ۇنەمى باقىلاپ وتىرامىز. «سپۋتنيك V»ء-دى ساتىپ الۋ جوسپاردا جوق. قازىرگى كەزدە قاراعاندى فارماسيەۆتيكالىق كومبيناتى بۇرىنعىداي دارى-دارمەكتەردى شىعارىپ جاتىر. ۆاكسيناعا دەيىن وسى جۇمىسپەن اينالىسقان. قازىرگى كەزدە ول جەردە ۆاكسينا شىعارىلمايدى»، - دەدى ەسماعامبەتوۆا.
ونىڭ سوزىنە قاراعاندا، قازىرگى ۆاكسينالار قازان ايىنا دەيىن جەتەدى. بۇدان كەيىن شەتەلدىك ۆاكسينالار تەگىن ەكپە ءۇشىن ساتىپ الىنبايدى. ونى تەك كامەلەت جاسقا تولماعان بالالار ءۇشىن جەتكىزىپ وتىرادى. ال ەرەسەك ادامدار وتاندىق QazVac-تى تەگىن ەكتىرە الادى. شەتەلدىك ۆاكسينانى اقىلى تۇردە سالدىرۋعا مۇمكىندىك بولادى.
ايتا كەتەرى، 2020 جىلى جەلتوقسان ايىندا قاراعاندى فارماسيەۆتيكالىق كومبيناتى رەسەيلىك «سپۋتنيك V» ۆاكسيناسىن شىعارۋدى باستاعان. ال بيىل قاڭتار ايىندا ريەۆاكسينالاۋ ءۇشىن «سپۋتنيك لايتتىڭ» 150 مىڭ دوزاسى جەتكىزىلدى.