بۇل – ءوتىپ بارا جاتقان جىلداعى ماڭىزدى جەتىستىكتىڭ ءبىرى
2023 جىلى قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ جۇمىسى جاندانا ءتۇستى.
اتاپ ايتقاندا، يۋنەسكو-نىڭ الماتى قالاسىنداعى كلاستەرلىك كەڭسەسى قازاقستان، قىرعىزستان، تاجىكستان، تۇرىكمەنستان، اۋعانستان، پاكىستان جانە يران مەملەكەتتەرىن قامتيتىن كوپسالالى ايماقتىق كەڭسە (بيۋرو) رەتىندە قايتا قۇرىلدى. پاريج قالاسىندا ەلىمىزدىڭ يۋنەسكو جانىنداعى تۇراقتى وكىلدىگى اشىلدى. وسى بەدەلدى ۇيىمنىڭ كلۋب قوزعالىسى اياسىندا قازاقستان العاش رەت يۋنەسكو-نىڭ كلۋبتارى مەن قاۋىمداستىقتارىنىڭ پرەزيدەنتى بولىپ سايلاندى.
ەلىمىز يۋنەسكو-نىڭ دۇنيەجۇزىلىك مۇرا كوميتەتىنە مۇشە بولدى. بۇل – ءوتىپ بارا جاتقان جىلداعى ماڭىزدى جەتىستىكتىڭ ءبىرى. وندا قازاقستان وتىنىشتەردى يۋنەسكو-نىڭ تىزىمىنە قوسۋ تۋرالى شەشىم قابىلداۋعا اتسالىسادى. سونداي-اق «تۇراننىڭ قىسقى سۋىق شولدەرى» ترانسۇلتتىق نىسانىنىڭ قۇرامداس بولىگى رەتىندە «التىن ەمەل» ۇلتتىق پاركى مەن بارساكەلمەس قورىعى اۋماقتارى دۇنيەجۇزىلىك مۇرا تىزىمىنە قوسىلدى. 2024-2025 جىلدارعا ارنالعان يۋنەسكو-نىڭ اتاۋلى كۇندەرى تىزبەسىنە جازۋشى ب.سوقپاقبايەۆتىڭ جانە كومپوزيتور، كۇيشى ن.تىلەندييەۆتىڭ 100 جىلدىعىن ەنگىزۋ تۋرالى ۇسىنىس قولداۋ تاپتى. «ديۋاني لۇعات ات-تۇرك» اتتى تۇركى تىلدەرىنىڭ تۇڭعىش ەنسيكلوپەديالىق سوزدىگىنىڭ 950 جىلدىعىن اتاپ ءوتۋ تۋرالى بىرلەسكەن ۇسىنىس تا قابىلداندى. قازاقستاننىڭ باستاماسىمەن 20 مامىردى دۇنيەجۇزىلىك مەترولوگيا كۇنى دەپ بەلگىلەۋ تۋرالى قارار ماقۇلداندى.
سونىمەن قاتار مەملەكەت باسشىسى قاسىم-جومارت توقايەۆتىڭ شاقىرۋىمەن 2023 جىلى يۋنەسكو-نىڭ باس ديرەكتورى ودرە ازۋلە ەلىمىزگە رەسمي ساپارمەن كەلدى. وسى ساپار اياسىندا ودرە ازۋلە استانادان بولەك، تۇركىستانداعى قوجا احمەت ياساۋي كەسەنەسىنە ارنايى بارىپ، قازاقستاندا تاريحي-مادەني مۇرالاردى ساقتاپ قالۋ ءۇشىن اتقارىلىپ جاتقان ءىس-شارالار بارىسىمەن تانىستى.
2024 جىلى ۇلتتىق كوميسسيا ءبىلىم، عىلىم، مادەنيەت، اقپارات، جانە كوممۋنيكاسيا سالالارى سياقتى يۋنەسكو مانداتىنىڭ بارلىق باعىتتارى بويىنشا مادەني مۇرالارىمىزدى قورعاۋ جۇمىسىن جالعاستىرادى.