اكىمدىكتەردىڭ گرانتىنا قۇجات قابىلداۋ ءجۇرىپ جاتىر.
جەرگىلىكتى اتقارۋشى ورگانداردىڭ ءبىلىم بەرۋ گرانتتارىنا قۇجات قابىلداۋ 10 تامىزدا باستالدى، دەپ حابارلايدى Almaty-akshamy.kz Baq.kz-كە سىلتەمە جاساپ.
وتىنىشتەردى جوعارى وقۋ ورىندارىنىڭ قابىلداۋ كوميسسيالارى قارايدى. قۇجاتتاردى قابىلداۋ مەرزىمى تۋرالى اقپاراتتى اكىمدىكتەن نەمەسە ولاردىڭ رەسمي سايتىنان الۋعا بولادى.
جىل سايىن مامانداردى ماقساتتى دايارلاۋعا جەرگىلىكتى اتقارۋشى ورگانداردىڭ (اكىمدىكتەردىڭ) بيۋدجەتىنەن ءبىلىم بەرۋ گرانتتارى بولىنەدى. اكىمدىكتەردىڭ گرانتتارى كونكۋرستىق نەگىزدە تاعايىندالادى. بۇل رەتتە حالىقتىڭ الەۋمەتتىك وسال توپتارىنا جاتاتىن تالاپكەرلەرگە ەرەكشە كوڭىل بولىنەدى.
ەلىمىز بويىنشا جەرگىلىكتى اتقارۋشى ورگاندار 3 مىڭعا جۋىق گرانت ءبولدى. نەگىزىنەن، اكىمدىكتەرگە پەداگوگتەر، مەديسينا قىزمەتكەرلەرى جانە اۋىل شارۋاشىلىق سالاسىنىڭ ماماندارى قاجەت. بيىل ەلوردا اكىمدىگى باكالاۆريات دەڭگەيى بويىنشا مامانداردى دايارلاۋعا ەڭ كوپ تاپسىرىس بەردى. نۇر-سۇلتان قالاسىنىڭ اكىمدىگى پەداگوگيكالىق جانە مەديسينالىق ماماندىقتار ءۇشىن 1200-گە جۋىق گرانت ءبولدى. شىعىس قازاقستان وبلىسى اباي وبلىسىمەن بىرلەسىپ 450 گرانت، اقمولا وبلىسى 229 گرانت تاعايىندادى.
ۇلت ۇستازى احمەت بايتۇرسىن ۇلىنىڭ 150 جىلدىعىن تويلاۋعا وراي قوستاناي وبلىسىنىڭ اكىمدىگى ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىندە وقۋعا 15 گرانت ءبولدى. ونەر سالاسىنىڭ ماماندارىن دايارلاۋعا تەك سولتۇستىك قازاقستان وبلىسىنىڭ اكىمدىگى گرانت ءبولىپ وتىر، ولار جەرگىلىكتى بيۋدجەت ەسەبىنەن 15 مامان وقىتۋعا دايىن.
شىمكەنت قالاسى مەن تۇركىستان وبلىسىنىڭ اكىمدىكتەرى بيىل باكالاۆرياتتا مامانداردى وقىتۋعا تاپسىرىس جاساماعان. الماتى قالاسى جانە پاۆلودار وبلىسىنىڭ اكىمدىكتەرى ءوڭىردىڭ جوعارى وقۋ ورنىنان كەيىنگى مەديسينالىق ءبىلىمى بار مامانداردى دايارلاۋعا قاجەتتىلىگىن ەسكەرە وتىرىپ، وبلىستىق بيۋدجەت قاراجاتىنان تەك ماگيستراتۋرا مەن رەزيدەنتۋرانىڭ ءبىلىم بەرۋ باعدارلامالارى بويىنشا گرانتتار بولەدى.
ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ۇمىتكەر جوعارى وقۋ ورنىنىڭ قابىلداۋ كوميسسياسىنا كەلەسى قۇجاتتاردى تاپسىرادى: ءبىلىمى تۋرالى قۇجات؛ ۇبت سەرتيفيكاتى؛ جەكە باسىن كۋالاندىراتىن قۇجاتتىڭ كوشىرمەسى؛ جەڭىلدىك ساناتىن راستايتىن قۇجاتتار.
گرانتتى تاعايىنداۋ تۋرالى شەشىمدى اكىمدىك جانىنان قۇرىلعان ارنايى كوميسسيا قابىلدايدى. جوعارى وقۋ ورىندارىنا قابىلداۋ 25 تامىزعا دەيىن جۇزەگە اسىرىلادى.