2021 جىلدىڭ 10 قىركۇيەگىنە دەيىن جالعاساتىن بايقاۋ اياسىندا ەكولوگيا جانە بيوالۋانتۇرلىلىكتى قورعاۋ سالاسىنداعى زاڭدى جانە جەكە تۇلعالار ءوز نومينانتتارىن ءارتۇرلى ساناتتار بويىنشا ۇسىنا الادى.
«ەلىم-اي» سىيلىعىن «رەسپۋبليكا-وڭىر-دامۋ» قق تاعايىنداعان جانە 2020 جىلدان باستاپ ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ قولداۋىمەن وتكىزىلەدى، دەپ حابارلايدى Almaty-akshamy.kz اتالعان مينيسترلىكتىڭ باسپا ءسوز قىزمەتىنە سىلتەمە جاساپ.
سىيلىق جىل سايىن قورشاعان ورتانى قورعاۋعا ەلەۋلى ۇلەس قوسقان زاڭدى جانە جەكە تۇلعالارعا تابيعاتتى ۇتىمدى پايدالانعانى، تابيعاتتى قورعاۋ ماقساتىنداعى عىلىمي قىزمەتى ءۇشىن بەرىلەدى.
ارنايى قۇرىلعان كوميسسيا ۇسىنىلعان قۇجاتتاردى قارايدى جانە سىيلىق الۋعا ۇمىتكەرلەردى ىرىكتەيدى. بايقاۋ ناتيجەلەرى 2021 جىلعى 19 قىركۇيەكتە حالىقارالىق ورمان شارۋاشىلىعى قىزمەتكەرلەرى كۇنىندە جاريالانادى.
سىيلىقتى ماراپاتتاۋ ءراسىمى ق ر ورمان شارۋاشىلىعى قىزمەتكەرلەرى كۇنى قارساڭىندا - قازاننىڭ ءۇشىنشى جەكسەنبىسىندە وتەدى.
بايقاۋ جەڭىمپازدارى كەلەسى نوميناسيالار بويىنشا ماراپاتتالادى:
جانۋارلار دۇنيەسىن قورعاۋ جونىندەگى ۇزدىك ينسپەكتور؛
ۇزدىك ورمانشى؛
ۇزدىك بالىق ءوسىرۋشى؛
ەڭ جاقسى پاناجاي؛
ۇزدىك ۇلتتىق پارك؛
ۇزدىك قورىق؛
ۇزدىك ۆولونتەر؛
تابيعاتتى قورعاۋ تۋرالى ۇزدىك جۋرناليستىك ماتەريال؛
جانۋارلارعا ارنالعان ەڭ جاقسى باسپانا؛
جاسىل قالا.
لاۋرەاتتار «ەلىم-اي» سىيلىعىنىڭ اتاۋلى مۇسىنشەلەرىمەن، ديپلومدارمەن جانە باعالى سىيلىقتارمەن ماراپاتتالادى.