الماتىدا قازاقستاننىڭ ەڭبەك سىڭىرگەن ءارتىسى، مادەنيەت قايراتكەرى باقىتجان ىسقاقوۆ تۇرعان ۇيگە ەسكەرتكىش-تاقتا ورناتىلدى. سالتاناتتى شارادا ءانشىنىڭ ۇزەڭگىلەستەرى، دوستارى مەن كورەرمەندەرى ءبىرتۋار تۇلعانى ەسكە الدى.
باقىتجان ىسقاقوۆ 1952 جىلى 10 ساۋىردە الماتى وبلىسى، جامبىل اۋدانى، قاراقاستەك اۋىلىندا دۇنيەگە كەلگەن. ون جىلدىق مەكتەپتى بىتىرگەننەن كەيىن، 1969 جىلى رەسپۋبليكالىق ەسترادا-سيرك ستۋدياسىنا وقۋعا تۇسكەن. اتاقتى پروفەسسور، ءان الەمىنىڭ ءدۇلد ۇلى ەرمەك سەركەبايەۆتىڭ تالانتتى شاكىرتىنىڭ ءبىرى اتانعان.
ول 1982–1987 جىلدارعا دەيىن ب.بايقاداموۆ اتىنداعى قازاقتىڭ مەملەكەتتىك حور كاپەللاسىندا ەڭبەك ەتكەن. كەيىننەن ونىڭ تۋما تالانتىنا ءتانتى بولعان سول كەزدەگى تەاتر ديرەكتورى قۋانىش ورازعالييەۆ 1987 جىلى اباي اتىنداعى قازاق مەملەكەتتىك وپەرا جانە بالەت تەاترىنا شاقىرتقان.
«تەاترعا كەلگەنىنە از ۋاقىت بولسا دا، باقىتجان بارلىق باريتون پارتيالارىن ورىنداپ، جۇلدىزى جارقىراپ جاندى. مەنىڭ ەسىمدە، سوناۋ 1997 جىلى بىزدەر گاسترولدىك ساپارمەن ورىنبور قالاسىنا باردىق. سول كەزدە مەنىڭ جانىما ءبىر كىسى كەلىپ، ورسك قالاسىندا 80% قازاقتاردىڭ تۇراتىندىعىن، ولاردىڭ دا ۇلتتىق ونەردى كورۋگە ىنتىق ەكەندىكتەرىن جەتكىزدى. نە كەرەك، جولىمىزدى، جاتىن ورنىمىزدى كوتەرىپ بەرگەن الگى كىسىلەر ءبىزدى ورسك قالاسىنا اكەلدى. ول جەردە بىزدەر «قىز-جىبەك» وپەراسىن ساحنالادىق. سول كەزدە كورەرمەن قوشەمەتىنىڭ بارلىعى بەكەجاندى ويناعان باقىتجانعا ارنالدى. قويىلىمنان كەيىن حالىقتىڭ كەتكىسى جوق، بارلىعىنىڭ كوڭىلدەرى بوساعان. باقىتجانعا ريزا بولعاندارى سونشالىقتى، ورسك قالاسىنىڭ اتىنان «جيگۋلي» ماشيناسىن سىيلادى. كوردىڭىزدەر مە؟ باقىتجاننىڭ تالانتى تالايدىڭ تاڭدايىن قاقتىراتىن ەدى»، – دەيدى قۋانىش ورازعالييەۆ.
باقىتجان تاكەن ۇلى بارلىق وپەرالىق سپەكتاكلدەردە باستى ءرولدى سومدادى. ولاردىڭ ىشىندە ا.جۇبانوۆ پەن ل.ءحاميديدىڭ «ابايىندا» اباي ءرولى جانە ە.برۋسيلوۆسكييدىڭ «قىز جىبەك» وپەراسىنداعى بەكەجاننىڭ ءرولى، ب.جۇمانيازوۆتىڭ «ماحامبەت» وپەراسىنداعى ماحامبەتتىڭ ءرولى، ۆەرديدىڭ «تراۆياتاسىندا» جەرموننىڭ ءرولى. ۆەرديدىڭ «ريگولەتتو» وپەراسىندا كوپتەگەن رولدەردە وينادى، ال «ەر تارعىن» وپەراسىنداعى ءانشىنىڭ ءرولى «التىن قوردا» ساقتالدى.
«ءبىز باقىتجانمەن ستۋدەنتتىك كەزدەن تانىس ەدىك. ءبىر جاعىنان جەرلەسىم، اعامداي بولىپ كەتكەن جان. ونىڭ انشىلىك عۇمىرىن تەك قانا شىڭعا ورلەۋمەن بايلانىستىرۋعا بولادى. كونسەرۆاتوريانى بىتىرگەننەن كەيىن ونەر جولىن قاراپايىم سوليست بولىپ باستاپ، ەڭ بيىك شوقتىعىنا جەتكەن كەزدە ومىردەن وزىپ كەتتى. وپەراداعى باريتون پارتيالارىنىڭ ىشىندەگى ەڭ جوعارعى نوتالاردى ءوز مانەرىمەن، شارىقتاتىپ ايتاتىن. كومپوزيتور بولعاندىقتان، ءبىزدىڭ ويىمىز ءبىر جەردەن شىعاتىن، الايدا ونىڭ كورەرمەنگە جەتكىزۋ مانەرى ەرەكشە بولاتىن»، – دەيدى قازاقستان كومپوزيتورلار قاۋىمداستىعىنىڭ ءتورايىمى بالنۇر قىدىربەك.
ەسكەرتكىش-تاقتا اباي اتىنداعى قازاق ۇلتتىق اكادەميالىق وپەرا جانە بالەت تەاترىنىڭ ۇجىمى مەن الماتى قالالىق اكىمدىگىنىڭ مۇرىندىق بولۋىمەن اشىلدى.
«بۇل كىسى باريتونداردىڭ ىشىندەگى تاڭداۋلىسى، داۋسى الەمدىك دەڭگەيدە بولدى. ۇلكەن پارتيالاردى 20 جىل بويى شارشاماي، تالماي ايتىپ جۇرگەن تالانتتى اعامىز ەدى. بىزدەگى ۇلكەن وبرازداردىڭ بارلىعىن تامساندىرا ورىنداعان باقىتجان اعامىز بولاتىن. ول كىسى جاستارعا تالىمگەرلىك ەتىپ، باعىت-باعدار بەرەتىن. «جاقسىعا ءجۇرىم جوق» دەمەكشى، نەبارى 53 جاسىندا ومىردەن ءوتتى. كوڭىلگە مەدەت بولارلىعى - ارتىندا ۇرپاقتارى قالدى»، – دەيدى اباي اتىنداعى قازاق ۇلتتىق اكادەميالىق وپەرا جانە بالەت تەاترىنىڭ ديرەكتورى نۇرباقىت بوكەبايەۆ.
تەاتر ساحناسىندا ءجۇرىپ، گاسترولدىق ساپارمەن شەتەلدەردى ارالاپ، قازاقتىڭ وپەرا ونەرىن الەمگە تانىتتى. ال 1997 جىلى قازاقستان رەسپۋبليكاسىنىڭ ەڭبەك سىڭىرگەن ءارتىسى اتاندى. باقىتجان ىسقاقوۆ انشىلىك قىزمەتىمەن قاتار، جۇسىپبەك ەلەبەكوۆ اتىنداعى رەسپۋبليكالىق ەسترادا-سيرك كوللەدجىندە ۇستازدىق ەتتى.
«باقىتجان ەرەكشە جىگىت ەدى. تابيعي دارىن، تابيعي داۋىسقا يە بولاتىن. ول كەزدەرى ءبىز جاسپىز، جاتاقحانادا تۇرامىز. سول شاقتاردا گيتارامەن ءان ايتاتىن. كەيىننەن ول وپەرا تەاترىنا اۋىستى، ۇلكەن وبرازداردى وينادى. «ورنىندا بار وڭالار» دەمەكشى، بۇگىن مىنە، ەسكەرتكىش-تاقتانىڭ اشىلۋىنا كەلىپ وتىرمىز. بۇل تاقتا بولاشاق جاستارعا، ۇرپاقتارعا تالىم-تاربيە بەرەتىن ۇلكەن قۇرال بولادى دەپ سەنەمىن»، – دەيدى قازاقستان رەسپۋبليكاسىنىڭ ەڭبەك سىڭىرگەن ءارتىسى ايدوس بەكتەمىر.
ءىس-شارا سوڭىندا باقىتجان ىسقاقوۆتىڭ ورىنداۋىنداعى اندەر جازىلعان كۇي-تاسپالار تاراتىلىپ، وپەرا ءانشىسىنىڭ اتى ناۋرىزباي اۋدانىنداعى كوشەنىڭ بىرىنە بەرىلەتىندىگىن ايتىلىپ، كوپشىلىكتى قۋانتتى. سونداي-اق، اسىل جارى قارلىعاش اپاي مەن ۇلى ءىلياس، قىزى ايگەرىم كەلگەن قوناقتارعا العىستارىن ءبىلدىردى.