دۇكەن ءماسىمحان ۇلىنىڭ مەرەيتويى اتالىپ ءوتتى
بۇگىن، 12 قازان كۇنى الماتىدا قىتايتانۋشى-عالىم، بەلگىلى اقىن ءارى اۋدارماشى، ۇلاعاتتى ۇستاز، قوعام قايراتكەرى، ف.ع.د.، پروفەسسور دۇكەن ءماسىمحان ۇلىنىڭ 60 جاسقا تولۋىنا وراي حالىقارالىق عىلىمي-كونفەرەنسيا ءوتتى. عالىمنىڭ شىعىستانۋ، قىتايتانۋ، كوركەم اۋدارما جانە ادەبيەت سالاسىنداعى ەڭبەكتەرىن قامتىعان بەس كىتابىنىڭ تۇساۋى كەسىلىپ، وقىرماندارعا جول تارتتى.
ۇلتتىق كىتاپحانانىڭ جيىن زالىندا باستالعان شاراعا ەلىمىزدەن جانە الىس-جۋىق شەتەلدەن شىعىستانۋشى، تاريحشى-عالىمدار، ءسوز زەرگەرلەرى اقىن-جازۋشىلار، قوعام قايراتكەرلەرى مەن زيالى قاۋىم وكىلدەرى، سونداي-اق، ديپلوماتتار قاتىستى.
د.ءماسىمحان ۇلىنىڭ 60 جاس تۋعان كۇنىنە ارنالعان اتاۋلى شارادا قارا شاڭىراق قازازاق ۇلتتىق ۋنيۆەرسيتەتىنەن تارتىپ ەلىمىزدەگى قابىرعالى ءبىلىم وردالارىنىڭ، ءتۇرلى ينيستيتۋتتاردىڭ ارنايى وكىلدەرى قۇتتىقتاۋلارىن جەتكىزىپ، سىي-سياپاتتارى تابىستادى. حالىقارالىق تۇركسوي ۇيىمى ارنايى قۇرمەت مەدالىن، ەۋرازيا ۇلتتىق ۋنيۆەرسيتەتى «كۇلتەگىن» مەدالدارىن تاقتى.
اۋقىمدى شارادا الماتى قالاسى اكىمدىگىنەن تارتىپ، ءار دارەجەلى رەسمي ورىندارىنىڭ قۇتتىقتاۋلارى وقىلدى. سونىمەن بىرگە، يران يسلام رەپۋبليكاسىنىڭ، قىرعىز رەسپۋبليكاسىنىڭ جانە ۆەنگريانىڭ قازاقستانداعى ەلشىلىكتەرى، ديپلوماتتارى عالىمدى مەرەيتويىمەن قۇتتىقتادى.
شارانىڭ العاشقى وتىرىسىندا د.ءماسىمحان ۇلىنىڭ «شىعىس الەمى: اڭىز بەن شىندىق» عىلىمي زەرتتەۋلەر جيناعى؛ «جۇڭگو قالامگەرلەرىنىڭ تاڭدامالى شىعارمالارى» دەپ اتالاتىن (5 تومدىق) كوركەم اۋدارمالار جيناعى؛ «جۇرەگىمنىڭ جۇمباعى» اتتى جىر جيناعى، سونداي-اق، «ۇلت پەن رۋح» عىلىمي زەرتتەۋلەر، ادەبي پورترەتتەر جيناعى قاتارلى اۆتورلىق ءتورت ەڭبەگىمەن قوسا، «عالىم. ۇستاز. اقىن. اۋدارماشى. ازامات» اتتى د. ءماسىمحان ۇلى تۋرالى ماقالالاردىڭ جيناعىنىڭ دا تۇساۋى كەسىلىپ، وقىرمانعا جول تارتتى.
قىتايتانۋشى-عالىم، ءارى ۇلاعاتتى ۇستازدىڭ اتاۋلى مەرەيتويىنا وراي وتكەن شارا تۇسەن كەيىن «قازاقستان جانە شىعىس ەلدەرى: تاريحي-مادەني ءھام ساياسي ىنتىماقتاستىقتىڭ جاڭا قىرلارى» اتتى حالىقارالىق عىلىمي-تاجىريبەلىك كونفەرەنسياعا ۇلاستى. وندا قازىرگى كەزەڭدەگى وتاندىق شىعىستانۋ عىلىمىنىڭ دامۋ باعىتتارى تالقىلاندى. وعان قوسا دۇكەن ءماسىمحان ۇلىنىڭ ءومىرى مەن عىلىمي شىعارماشىلىعى، ونىڭ وتاندىق شىعىستانۋ عىلىمىنا قوسقان ۇلەسىنە قاتىستى اڭگىمە ءوربىتىلدى.
