تەننيس: قازاقستاننىڭ ءبىرىنشى راكەتكاسى ەلەنا رىباكينا كەلەسى كەزەڭگە ءوتتى
ەلەنا رىباكينا US Open ءتۋرنيرىنىڭ ءۇشىنشى اينالىمىنا شىقتى، دەپ حابارلايدى Almaty-akshamy.kz Olympic.kz-كە سىلتەمە جاساپ.
وسى «ۇلكەن دۋلىعا» دوداسىنىڭ 19-راكەتكاسى بولىپ تىركەلگەن ە.رىباكينا ەكىنشى اينالىمدا دۇنيەجۇزىلىك رەيتينگتە 62-ورىندا تۇرعان فرانسيالىق كارولنن گارسيامەن كورتقا شىقتى. ءبىر ساعاتتان ءسال استام ۋاقىتقا سوزىلعان ماچتا قازاقستاندىق تەننيسشى قارسىلاسىن 6:1، 6:4 ەسەبىمەن قينالماي ۇتتى. ە.رىباكينا باسەكە بارىسىندا 11 ەيس جاساپ، 6 برەيك-پوينتتىڭ تەڭ جارتىسىن پايدالاندى. برەيككە قول جەتكىزبەگەن ك.گارسيا 1 عانا ەيسپەن شەكتەلدى. قازاقستاندىق سپورتشىنىڭ كەلەسى قارسىلاسى - 2018 جىلعى رولان گارروس، 2019 جىلعى ۋيمبلدون تۋرنيرلەرىنىڭ چەمپيونى، قازىرگى كەزدە رەيتينگتە 13-ورىندا تۇرعان رۋمىنيالىق سيمونا حالەپ.