جارىس 23 ساۋىردە مارەگە جەتەدى
قازاقستاننىڭ ءبىرىنشى، الەمنىڭ 7-راكەتكاسى ەلەنا رىباكينا گەرمانيانىڭ شتۋتگارت قالاسىندا WTA 500 ءتۋرنيرىن جەڭىسپەن باستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاننىڭ كوشباسشى تەننيسشىسى باستاپقى كەزدەسۋىن دۇنيەجۇزىلىك رەيتينگىدە 65-ورىندا تۇرعان گەرمانيالىق يۋلە نيمايەرمەن وتكىزدى.
قارسىلاستاردىڭ بۇعان دەيىن ءوزارا جولدارى توقايلاسپاعان ەدى.
ەلەنا رىباكينا ءبىر جارىم ساعاتقا سوزىلعان ماچتا 7:5، 6:3 ەسەبىمەن جەڭىسكە جەتتى.
قازاقستاندىق سپورتشى 9 ەيس جاساپ، 5 برەيك-پوينتتىڭ ۇشەۋىن ءوز ەسەبىنە جازدى. قارسىلاسى 2 ەيس، 1 برەيكپەن (6 برەيك-پوينت) كوزگە ءتۇستى.
ە. رىباكينا شيرەك فينالعا شىعۋ ءۇشىن الەمنىڭ 14-راكەتكاسى، برازيليالىق بەاتريس حادداد ماييامەن تالاسادى.
جۇلدە قورى 780 637 اقش دوللارىنا باعالانعان جارىس 23 ساۋىردە مارەگە جەتەدى.
ەسكە سالا كەتەيىك، بۇدان بۇرىن ەلەنا رىباكينانىڭ شتۋتگارت تۋرنيرىندەگى قارسىلاسى انىقتالعانىن جازعان ەدىك.