ۆاكسينوپروفيلاكتيكا – مەديسينانىڭ ەڭ ۇلكەن جەتىستىگى
23-29 ءساۋىر ارالىعىندا مەگاپوليستە يممۋنداۋ اپتالىعى وتەدى. بۇل تۋرالى الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى ءمالىم ەتتى، دەپ حابارلايدى Almaty-akshamy.kz.
يممۋنداۋ اپتالىعىنىڭ ماقساتى – تۇرعىنداردى ۆاكسيناسيامەن قامتۋ دەڭگەيىن ارتتىرۋ، حالىققا ءاربىر بالانىڭ ەكپەمەن الدىن الاتىن اۋرۋلاردان قورعالۋى قاجەت ەكەنىن ءتۇسىندىرۋ.
«ۆاكسينوپروفيلاكتيكا – مەديسينانىڭ ەڭ ۇلكەن جەتىستىگى جانە قازاقستاندا عانا ەمەس، بۇكىل الەمدە قوعامدىق دەنساۋلىق ساقتاۋدىڭ ەكونوميكالىق ءتيىمدى شاراسى. ۆاكسيناسيا – حالىقتى جۇقپالى اۋرۋلاردىڭ پايدا بولۋى مەن تارالۋىنان قورعاۋدىڭ ەڭ ءتيىمدى قۇرالدارىنىڭ، سونىمەن قاتار ەڭ ءقاۋىپسىز مەديسينالىق ارالاسۋلاردىڭ ءبىرى. ۇلتتىق ەگۋ كۇنتىزبەسىنە سايكەس، جوسپارلى تۇردە تۋبەركۋلەزگە، ۆ ۆيرۋستىق گەپاتيتىنە، پوليوميەليتكە، كوكجوتەلگە، سىرەسپە ديفتەرياسىنا، قىزىلشاعا، قىزامىققا، ەپيدەميالىق پاروتيتكە، گەموفيلدى جانە پنيەۆموكوككتى ينفەكسياعا قارسى ۆاكسيناسيا جۇرگىزىلەدى»، - دەدى الماتى قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى قاسىمحان الپىسباي ۇلى.
ونىڭ ايتۋىنشا، بۇگىندە ۆاكسينالاردىڭ ەكىدەن التىعا دەيىنگى كومپونەنتتەرىن ءبىر دوزادا بىرىكتىرۋگە مۇمكىندىك بەرەتىن، ينەكسيالاردىڭ سانىن ازايتاتىن ۆاكسينالار بار. ءبىزدىڭ ەلدە قولدانىلاتىن بارلىق ۆاكسينالاردى ددۇ پايدالانۋعا ۇسىنعان جانە قازاقستاندا تىركەلگەن.
«رەسپۋبليكا اۋماعىندا قولدانىلاتىن ۆاكسينالار ءقاۋىپسىز جانە تيىمدىلىگى جوعارى»، - دەدى ول.
سونىمەن قاتار، ول كوپتەگەن اتا-انا پروفيلاكتيكالىق ۆاكسينانى بالالارىنا ەگۋدەن باس تارتاتىنىن تىلگە تيەك ەتتى.
«بۇل رەتتە ءارتۇرلى الەۋمەتتىك جەلىدە تارالاتىن بۇرمالانعان، دۇرىس ەمەس اقپارات كەرى اسەر ەتەدى. بالاسىنا ۆاكسينا سالعىزۋدان باس تارتقان اتا-انالار تەك وزدەرىنە عانا ەمەس، باسقا بالالارعا دا جۇقتىرۋ ءقاۋپىن تۋدىرادى»، - دەدى ول.
الماتى قالاسىندا ەۋروپالىق يممۋنداۋ اپتالىعىن وتكىزۋ كەزەڭىندە ۆاكسيناسيا تۇرعىلىقتى جەرى بويىنشا ەمحانالاردا تەگىن جۇرگىزىلەدى. قالا ەمحانالارى ۆاكسيناسيا ماسەلەلەرى بويىنشا حالىققا كونسۋلتاسيالىق كومەك كورسەتۋگە، ۆاكسيناسيا تۋرالى دەرەكتەرسىز باسقا وڭىرلەردەن كەلگەن نەمەسە ەكپە الماعان بالالاردى ەگۋگە دايىن.