ەلەنا رىباكينا ريم ماستەرس ءتۋرنيرىنىڭ ءۇشىنشى اينالىمىنا ءوتتى

قازاقستاندىق تەننيسشى الەمنىڭ 65-راكەتكاسى، يتاليالىق ياسمين پاولينيمەن كەزدەستى.

قازاقستاننىڭ ءبىرىنشى، الەمنىڭ 6-راكەتكاسى ەلەنا رىباكينا ريم WTA 1000 ءتۋرنيرىنىڭ ءۇشىنشى اينالىمىنا شىقتى، دەپ حابارلايدى اlmaty-akshamy.kz قازاقپاراتقا سىلتەمە جاساپ. 

جارىستى ەكىنشى اينالىمنان باستاعان قازاقستاندىق تەننيسشى الەمنىڭ 65-راكەتكاسى، يتاليالىق ياسمين پاولينيمەن كەزدەستى.

ءبىرىنشى پارتيادا ە.رىباكينا تاي-برەيكتە باسىم ءتۇستى - 7:6 (7:4).

ەكىنشى سەت جەڭىلىرەك بولدى - 6:1.

ساعات جارىمنان استام ۋاقىتقا سوزىلعان ماچتا ە.رىباكينا 6 ەيس جاساپ، 7 برەيك-پوينتتىڭ بەسەۋىن پايدالانا ءبىلدى. قارسىلاسى 3 برەيكپەن (9 برەيك-پوينت) كوزگە ءتۇستى.

ەلەنا رىباكينا ءتورتىنشى اينالىمعا شىعۋ ءۇشىن الەمنىڭ 57-راكەتكاسى، رەسەيلىك اننا كالينسكايامەن تالاسادى. ول الەمنىڭ 26-راكەتكاسى، بەلگيالىق ەليزا مەرتەنستى جولدان تايدىردى - 6:4، 4:6، 6:3.

ا.كالينسكايامەن قازاقستاندىق سپورتشى ءوزارا ءۇش رەت ويناپ، سونىڭ ەكەۋىندە رەسەيلىك جەڭىسكە جەتتى. بيىل مايامي ماستەرس جارىسىندا ەلەنا 7:5، 4:6، 6:3 ەسەبىمەن جەڭگەن ەدى. الايدا مادريدتە ءدال وسىنداي دودادا ۇتىلىپ قالدى - 5:7، 6:4، 2:6.

قازاقستاننىڭ جۇپتىق سىنداعى ءبىرىنشى، الەمنىڭ 26-راكەتكاسى اننا دانيلينا ماجارستاندىق تيمەيا بابوشپەن بىرگە ريم ءتۋرنيرىن جەڭىسپەن باستادى. ولار العاشقى اينالىمدا امەريكالىق ەمما مۋحامماد - مەكسيكالىق دجۋليانا ولموستى ۇتتى - 4:6، 6:3، 10:6. ەندى ولار شيرەك فينالعا شىعۋ ءۇشىن بەلارۋس وكىلى ۆيكتوريا ازارەنكو - برازيليالىق بەاتريس حادداد ماييامەن شەبەرلىك بايقاسادى.