ەلەنا رىباكينا ريم جارىسىنىڭ ەكىنشى اينالىمىنا ءوتتى

دوپ بەرگەن ءساتتى ءمۇلت جىبەردى. 

قازاقستاننىڭ ءبىرىنشى، الەمنىڭ 17-راكەتكاسى ەلەنا رىباكينا ريم WTA 1000 ءتۋرنيرىنىڭ ەكىنشى اينالىمىنا ءوتتى، دەپ حابارلايدى Almaty-akshamy.kz Olympic.kz سىلتەمە جاساپ.

قازاقستاندىق تەننيسشى العاشقى اينالىمدا ىرىكتەۋ سايىستارى جەڭىمپازدارىنىڭ ءبىرى، دۇنيەجۇزىلىك رەيتينگتە 146-ورىندا تۇرعان 19 جاستاعى رەسەيلىك ەلينا اۆانەسيانمەن شەبەرلىك بايقاستى. ءبىرىنشى پارتيادا ەسەپ 4:4 بولعان مەزەتتە رىباكينا ءتورتىنشى برەيككە قول جەتكىزىپ، سوسىن ءوز گەيمىن دە الدى – 6:4. ەكىنشى سەتتە ەسەپ 5:3 بولعان كەزدە دوپ بەرگەن اۆانەسيان ءوز مۇمكىندىگىن پايدالانا المادى. بۇدان كەيىن قاتارىنان ءۇش گەيمدى العان ەلەنا ماچقا دوپ بەرگەن ءساتتى ءمۇلت جىبەردى – 6:6. دەگەنمەن، تاي-برەيكتە ەلەنا قارسىلاسىنا بىردە-بىر ۇپاي بەرگەن جوق – 7:6 (7:0). ءبىر ساعات 50 مينۋتقا سوزىلعان ماچ بارىسىندا قازاقستاندىق سپورتشى 2 ەيسپەن بىرگە 10 برەيك-پوينتتىڭ التاۋىن پايدالاندى. قارسىلاسى 5 برەيكپەن (11 برەيك-پوينت) ەرەكشەلەندى.

رىباكينا جۇلدە قورى 2،5 ملن ەۋرودان اساتىن جارىستىڭ ءۇشىنشى اينالىمىنا شىعۋ ءۇشىن رەيتينگتە 102-ساتىداعى امەريكالىق لورەن ديەۆيسپەن تالاسادى. نەگىزگى تۋرنيرگە ىرىكتەۋ سايىستارىنان قوسىلعان ديەۆيس العاشقى اينالىمدا الەمنىڭ 13-راكەتكاسى، 2017 جىلعى رولان گارروس دوداسىنىڭ جەڭىمپازى، لاتۆيالىق ەلەنا وستاپەنكونى 6:2، 6:3 ەسەبىمەن جولدان تايدىردى.