قازاقستاننىڭ ۇزدىك تەننيسشىسى WTA Live رەيتينگىسىندە ءۇشىنشى ورىنعا كوتەرىلدى، دەپ حابارلايدى Almaty-akshamy.kz.
نيۋ-يوركتا ءوتىپ جاتقان اقش اشىق چەمپيوناتىنىڭ ءتورتىنشى اينالىمىندا الەمنىڭ 3-راكەتكاسى، امەريكالىق دجەسسيكا پەگۋلا دۇنيەجۇزىلىك رەيتينگتە 17-ورىندا تۇرعان وتانداسى مەديسون كيزدان 1:6، 3:6 ەسەبىمەن جەڭىلىپ قالدى.
وتكەن جىلى وسى «ۇلكەن دۋلىعا» ءتۋرنيرىنىڭ شيرەك فينالىنا دەيىن جەتكەن د.پەگۋلا ۇپايلارىن جوعالتتى.
قازىرگى كەزدە Live رەيتينگتە 5790 ۇپايمەن ە.رىباكينا ءۇشىنشى ورىنعا شىقسا، د.پەگۋلا (5755) ءتورتىنشى ساتىعا سىرعىدى.
اقش اشىق چەمپيوناتىنىڭ قورىتىندىسىمەن ءقازىردىڭ وزىندە بەلورۋسسيالىق ارينا سوبولەنكو رەيتينگتە سپورتتىق جولىندا العاش رەت كوش باستايدى. ويتكەنى وتكەن جىلعى جەڭىمپاز، پولشا وكىلى يگا شۆەنتەك ءتورتىنشى اينالىمدا لاتۆيالىق ەلەنا وستاپەنكوعا جول بەردى – 6:3، 3:6، 1:6. ەندى ي.شۆەنتەك ەكىنشى ورىنعا سىرعيدى.
ەگەر اقش بىرىنشىلىگىندە تاعى ءبىر امەريكالىق، الەمنىڭ 6-راكەتكاسى كوكو گاۋفف چەمپيون اتاناتىن بولسا، وندا ول ە.رىباكينانى ىعىستىرىپ، ۇزدىك ۇشتىككە ەنەدى. سوندىقتان وسى تۋرنير قورىتىندىسىن كۇتۋگە تۋرا كەلەدى.