سونداي-اق يۋليا پۋتينسيەۆا اۋسترالياداعى جارىستىڭ شيرەك فينالىنا شىقتى.
قازاقستاننىڭ ءبىرىنشى راكەتكاسى ەلەنا رىباكينا جۇپتىق سىندا ادەلايدا (اۋستراليا) WTA 500 ءتۋرنيرىنىڭ فينالىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ە.رىباكينا رەسەيلىك اناستاسيا پاۆليۋچەنكوۆامەن بىرگە جارتىلاي فينالدا جارىستىڭ ءۇشىنشى راكەتكالارى، ۋكراينالىق ليۋدميلا كيچەنوك – لاتۆيالىق ەلەنا وستاپەنكومەن شەبەرلىك بايقاستى.
قازاقستاندىق-رەسەيلىك جۇپ ءبىرىنشى پارتيادا بىردەن برەيك جاساپ، باسىمدىلىعىنان ايىرىلعان جوق – 6:4.
ولار ەكىنشى سەتتە ەسەپ 4:5 بولعان مەزەتتە قارسىلاستارىنىڭ ەكى سەتبولىنىڭ ءبىرىن پايدالانۋىنا مۇمكىندىك بەرگەن جوق. اقىرى تارازى باسىن وزدەرىنە اۋداردى – 7:5.
ساعات جارىمعا سوزىلعان ماچتا قازاقستاندىق-رەسەيلىك دۋەت 4 ەيس جاساپ، 15 برەيك-پوينتتىڭ ۇشەۋىن ءوز ەسەبىنە جازدى. قارسىلاستارى ءبىر برەيكتەن اسا العان جوق.
وسىلايشا، ە.رىباكينا ا.پاۆليۋچەنكوۆامەن بىرگە سپورتتىق جولىندا ەكىنشى رەت WTA فينالىنا جولداما الدى.
ولار سوڭعى باسەكەدە چەحيالىقتار ميريام كولودزەجوۆا – ماركەتا ۆوندروۋشوۆا نەمەسە برازيليالىق لۋيزا ستەفاني – امەريكالىق تەيلور تاۋنسەند جۇپتارىنىڭ قاي جەڭگەنىمەن باس جۇلدەنى ساراپقا سالادى.
ەسكە سالا كەتەيىك، بۇدان بۇرىن ەلەنا رىباكينانىڭ جۇپتىق سىندا ادەلايدا ءتۋرنيرىنىڭ جارتىلاي فينالىنا وتكەنىن جازعان بولاتىنبىز.
سونداي-اق يۋليا پۋتينسيەۆا اۋسترالياداعى جارىستىڭ شيرەك فينالىنا شىقتى.