كەلەر جىلدان باستاپ قازاقستاندا جاڭا سالىق كودەكسى كۇشىنە ەنەدى. وسىعان بايلانىستى قارجى مينيسترلىگى مەملەكەتتىك ساتىپ الۋ كەزىندە قوسىلعان قۇن سالىعى (ققس) قالاي ەسەپتەلەتىنىن ءتۇسىندىردى، - دەپ حابارلايدى اqshamnews.kz ءتىلشىسى مينيسترلىككە سىلتەمە جاساپ.
جىلدىق جوسپارلار ققس-سىز جاسالادى
2024 جىلعى 1 شىلدەدەن باستاپ «مەملەكەتتىك ساتىپ الۋ تۋرالى» زاڭعا سايكەس، مەملەكەتتىك ورگانداردىڭ جىلدىق ساتىپ الۋ جوسپارلارى:
-
بەكىتىلگەن بيۋدجەتتەرگە،
-
جانە قارجىلاندىرۋ جوسپارلارىنا سۇيەنە وتىرىپ جاسالادى.
بۇل جوسپارلاردا سوما ققس-سىز كورسەتىلەدى. ياعني الدىن الا جىلدىق جوسپارعا ققس ەنگىزىلمەيدى، اۆانس سوماسى دا ققس-سىز ەسەپتەلەدى.
ققس كەلىسىمشارتتا كورسەتىلەدى
ققس پەن اكسيزدەر:
-
تىكەلەي ساتىپ الۋ راسىمدەرىنىڭ قورىتىندىسى بويىنشا جاسالاتىن كەلىسىمشارتتا كورسەتىلەدى.
بۇل – سالىق جانە كەدەن زاڭناماسىنىڭ تالاپتارىنا ساي ءراسىم.
2026 جىلدان باستاپ ققس – 16% بولماق
سالىق كودەكسىنە سايكەس:
-
ققس تاۋار، جۇمىس، قىزمەت وتكىزىلگەن كەزدە ەسەپتەلەدى؛
-
اينالىم جاسالعان كۇن – تاۋار بەرىلگەن كۇن نەمەسە ورىندالعان جۇمىس، كورسەتىلگەن قىزمەت اكتىسىنە قول قويىلعان كۇن.
2026 جىلدىڭ قاڭتارىنان باستاپ ققس مولشەرلەمەسى 16% بولادى.
ماڭىزدىسى – بۇل مولشەرلەمە:
-
وسى ۋاقىتقا دەيىن جاسالعان كەلىسىمشارتتارعا دا،
-
بارلىق سالىق سالىناتىن اينالىمعا قولدانىلادى.
ياعني كەلىسىمشارت بۇرىن جاسالسا دا، ەگەر اينالىم 2026 جىلدان كەيىن جۇرسە – ققس 16% مولشەرلەمەمەن ەسەپتەلەدى.
جەتكىزۋشىنىڭ ققس مارتەبەسى جانە كەلىسىمشارتتى تۇزەتۋ
ققس تولەۋشىلەرگە قاتىستى:
"ققس تولەيتىن تۇلعالار (جەتكىزۋشىلەر) سالىق كودەكسىنىڭ تالاپتارىنا سايكەس شوت-فاكتۋرالاردى ۇسىنۋعا مىندەتتى. ەگەر جەتكىزۋشى ققس تولەۋشى مارتەبەسىن وزگەرتسە، زاڭمەن مەملەكەتتىك ساتىپ الۋ كەلىسىمشارتىنا تۇزەتۋلەر ەنگىزۋگە، سونىڭ ىشىندە كەلىسىمشارتتاعى سومانى ءتيىستى سالىق مولشەرىنە ساي تۇزەتۋگە رۇقسات بەرىلەدى. دەسە دە جەتكىزىلەتىن تاۋارلاردىڭ ساپاسى مەن جەتكىزۋ شارتتارى وزگەرىسسىز قالاتىنىن ۇمىتپاعان ءجون"، - دەلىنگەن مالىمدەمەدە.
ۆەب-پورتال ققس-تى اۆتومات تۇردە ەسەپتەيدى
مەملەكەتتىك ساتىپ الۋ ۆەب-پورتالى:
-
جەتكىزۋشىنىڭ ققس تولەۋشى نە تولەمەيتىنىن اۆتومات تۇردە انىقتايدى؛
-
كەلىسىمشارتتا ققس سوماسىن ءوزى قالىپتاستىرادى؛
-
باعانى پوزيسيالار بويىنشا ققس سالىناتىن جانە سالىنبايتىن بولىككە بولۋگە مۇمكىندىك بەرەدى.
سوندىقتان 2026 جىلعى 1 قاڭتاردان باستاپ:
-
مەملەكەتتىك ساتىپ الۋ كەلىسىمشارتتارى ورىندالعان كەزدە،
-
ەگەر جەتكىزۋشى اينالىم جاسالعان ساتتە ققس تولەۋشى بولسا،
-
كەلىسىمشارت قاشان جاسالعانىنا قاراماستان، 16% ققس سالىنادى.
مينيسترلىكتىڭ ماقساتى – اشىقتىق
قارجى مينيسترلىگى مەملەكەتتىك ساتىپ الۋ سالاسىندا ققس قولدانىلۋىن بارشا قاتىسۋشىعا تۇسىنىكتى جانە اشىق ەتۋدى ماقسات ەتىپ وتىر.
وسى ءۇشىن:
-
ۆەب-پورتال تەحنيكالىق جاعىنان جاڭارتىلدى؛
-
جۇيە جەتكىزۋشىنىڭ ققس تولەۋشى مارتەبەسىن اۆتوماتتى تۇردە ەسكەرىپ،
-
كەلىسىمشارتتاعى ناقتى قورىتىندى سومانى تۇزەتۋگە مۇمكىندىك بەرەدى.
بۇل ءتاسىل:
-
قاتەلىكتەر مەن سايكەسسىزدىكتەردىڭ الدىن الۋ،
-
داۋلاردى ازايتۋ،
-
سالىق زاڭناماسىن ءبىرىزدى قولدانۋدى قامتاماسىز ەتۋ ءۇشىن ەنگىزىلگەن.