ەلەنا رىباكينا ادەلايدا ءتۋرنيرىنىڭ شيرەك فينالىنا شىعا المادى

قازاقستاندىق سپورتشى ءۇش سەت-پوينتتى پايدالانا المادى.

قازاقستاننىڭ ءبىرىنشى، الەمنىڭ 21-راكەتكاسى ەلەنا رىباكينا ادەلايدا (اۋستراليا) WTA 500 ءتۋرنيرىنىڭ شيرەك فينالىنا شىعا المادى، دەپ حابارلايدى Almaty-akshamy.kz.

قازاقستاندىق تەننيسشى ەكىنشى اينالىمدا دۇنيەجۇزىلىك رەيتينگتە 69-ورىندا تۇرعان 20 جاستاعى ۋكراينالىق مارتا كوستيۋكپەن شەبەرلىك بايقاستى.

قارسىلاستار وسىعان دەيىن ءبىر رەت كەزدەسىپ، 2017 جىلى جاسوسپىرىمدەر اراسىنداعى اۋستراليا اشىق چەمپيوناتىندا م.كوستيۋك ە.رىباكينانى 6:1، 7:5 ەسەبىمەن جەڭگەن.

بۇل جولى ءبىرىنشى پارتيادا ەسەپ 5:4 بولعان مەزەتتە قازاقستاندىق سپورتشى ءۇش سەت-پوينتتى پايدالانا المادى. دەگەنمەن تاي-برەيكتە ءوز مۇمكىندىگىن ءمۇلت جىبەرگەن جوق - 7:6 (7:5).

ەكىنشى سەتتە ەسەسىنە م.كوستيۋك برەيكپەن العا كەتتى – 2:0. ول بۇل پارتيانى تاعى ءبىر برەيكپەن ءتامامدادى – 6:2.

ءۇشىنشى، شەشۋشى پارتيانى ە.رىباكينا برەيكپەن باستاعانىمەن، بۇدان كەيىن ۋكراينالىق سپورتشى كۇش الىپ كەتتى – 4:1. اقىرى ماچتى جەڭىسپەن اياقتاي ءبىلدى – 6:3.

ەكى ساعات 21 مينۋتقا سوزىلعان تارتىستى باسەكە بارىسىندا ە.رىباكينا 7 ەيس جاساپ، 10 برەيك-پوينتتىڭ بىرەۋىن عانا پايدالاندى. قارسىلاسى 5 ەيس، 4 برەيكپەن (9 برەيك-پوينت) كوزگە ءتۇستى.

م.كوستيۋك جارتىلاي فينالعا شىعۋ ءۇشىن الەمنىڭ ەكىنشى، جارىستىڭ 1-راكەتكاسى، تۋنيستىك ونس جابەر نەمەسە رەيتينگتە 45-ساتىداعى رۋمىنيالىق سورانا كىرستيانىڭ بىرەۋىمەن تالاسادى.

وتكەن جىلى ە.رىباكينا وسى دودانىڭ فينالىنا دەيىن جەتكەن ەدى.