ەلەكتروندى مۇرىندى بىلەسىز بە؟

ول تاعامنىڭ بۇزىلعان-بۇزىلماعانىن ءدال انىقتاپ بەرەدى.

نورۆەگياداعى عىلىم جانە تەحنولوگيا ۋنيۆەرسيتەتى عالىمدارى جەمىستىڭ نەمەسە وسىمدىكتىڭ ساۋ ەكەنىن 96،7 پايىز دالدىكپەن انىقتاۋعا قابىلەتتى قۇرىلعى جاسادى، دەپ حابارلايدى aqshamnews.kz 

زەرتتەۋ ناتيجەلەرى  Sensors and Actuators B. Chemical جۋرنالىنا جاريالانعان.

ەلەكتروندى-مۇرىننىڭ قۇرىلىمى وڭاي: بار بولعانى ءبىر انتەنناسى بار.  بۇرىنعى قۇرىلعىلار وتە كۇردەلى ءارى قىمبات بولاتىن.

باستى مىندەت – كوپ مولشەردە ءقاۋىپتى دەپ ەسەپتەلەتىن ۇشپالى ورگانيك قوسىلىستاردى (ۇوق نەمەسە لوس – لەتۋچيە ورگانيچەسكيە سوەدينەنيا) ءدال جىكتەۋ.

اۆتورلاردىڭ ايتۋىنشا، ۇوق-تىڭ حيميالىق قۇرامى – ادامنىڭ تىنىس الۋى، ازىق-تۇلىكتىڭ ءشىرۋى، ءوندىرىس پروسەسىندەگى ماڭىزدى ينديكاتور. ساۋ ادام مەن اۋرۋ ادامنىڭ تىنىس الۋى ۇوق-تىڭ مولشەرى بويىنشا انىقتالادى، ياعني، اۋرۋ ادام تىنىس العاندا اۋاعا زياندى قوسىلىستار تارايدى.

ە-مۇرىننىڭ جۇمىسىن تەكسەرۋ ءۇشىن عالىمدار دۇكەننەن جاڭا ساتىپ الىنعان قۇلپىناي، ءجۇزىم، الما مەن شوشقانىڭ ەتىن تەكسەرىپ كوردى. قۇرىلعى جاقسى ناتيجە كورسەتتى.

ەندى ە-مۇرىندى شاعىن ءارى ارزان ەتىپ شىعارىپ، تۇرمىستا، اۋىل شارۋاشىلىعىندا، مەديسينادا قولدانۋعا بولادى دەيدى عالىمدار. قانداعى قانت قۇرامىن دا تەكسەرۋگە بولادى ەكەن.