ەلەكتروندى ەڭبەك بيرجاسى ارقىلى جارتى ميلليونعا جۋىق قازاقستاندىق جۇمىس تاپتى

ماماندار ەەب مۇمكىندىگى تۋرالى ايتتى.

ءقازىر ەلەكتروندى ەڭبەك بيرجاسىندا 106،7 مىڭنان استام بوس جۇمىس ورنى جاريالانعان، دەپ حابارلايدى Almaty-akshamy.kz قازاقپاراتقا سىلتەمە جاساپ.

ورتالىق كوممۋنيكاسيالار قىزمەتى الاڭىندا ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ولجاس وردابايەۆ ەلەكتروندى ەڭبەك بيرجاسىنىڭ مۇمكىندىگى تۋرالى ايتتى.

ونىڭ مالىمدەۋىنشە، اتالعان پلاتفورما كاسىبي باعدار مەن داعدىلاردى يگەرۋدەن باستاپ، جۇمىسپەن قامتۋ، ەڭبەك قاتىناستارىن رەسىمدەۋ تاعى سول سياقتى قىزمەتتەردىڭ سۋپەرماركەتىنە اينالعان.

«بيزنەستىڭ ۇلتتىق جوبالارى مەن جەكە باستامالارى شەڭبەرىندە قۇرىلاتىن بارلىق جۇمىس ورىندارى ەلەكتروندى ەڭبەك بيرجاسىندا جاريالانادى. بۇگىندە پلاتفورما جۇمىس جانە جۇمىسشىلاردى ىزدەۋدىڭ ءبىرىڭعاي الاڭىنا اينالدى. ءقازىر ەلەكتروندى ەڭبەك بيرجاسىندا جۇمىس بەرۋشىلەردەن 106،7 مىڭنان استام بوس جۇمىس ورنى، ال جۇمىس ىزدەۋشىلەردەن 134،8 مىڭنان استام تۇيىندەمە جاريالانعان. جىل باسىنان بەرى ەلەكتروندى ەڭبەك بيرجاسى ارقىلى 445،1 مىڭ ادام جۇمىس تاپتى»، – دەدى ولجاس وردابايەۆ بريفينگتە.