قازاقستاندا ەكولوگيالىق تازا كولىكتەرگە جاڭا زاڭ قابىلداندى
بۇگىن قازاقستان رەسپۋبليكاسى ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكولوگيالىق تازا كولىكتى تانىمال ەتۋ جانە ەلەكتروموبيلدەرگە ارنالعان ينفراقۇرىلىمدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، رەسمي تۇردە قابىلداندى، دەپ حابارلايدى almaty-akshamy.kz
بۇل زاڭ جوباسىن پارلامەنت ءماجىلىسىنىڭ دەپۋتاتتارى باستاماشى بولىپ، 2024 جىلعى 17 قاڭتاردا ءبىرىنشى وقىلىمدا ماقۇلدادى. زاڭنىڭ نەگىزگى ماقساتى – ەلىمىزدە ەلەكترموبيلدەر ينفراقۇرىلىمىن دامىتۋ جانە ەكولوگيالىق تازا كولىكتەردى تانىمال ەتۋ بولىپ تابىلادى.
ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ مالىمەتىنشە، قۇجات اياسىندا بىرنەشە زاڭدارعا وزگەرىستەر مەن تولىقتىرۋلار ەنگىزىلەدى. ولاردىڭ ىشىندە ق ر جەر كودەكسى، «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-وزى باسقارۋ تۋرالى»، «قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى تۋرالى»، «اۆتوموبيل جولدارى تۋرالى»، «اۆتوموبيل كولىگى تۋرالى»، «ەلەكتر ەنەرگەتيكاسى تۋرالى»، «ەرەكشە قورعالاتىن تابيعي اۋماقتار تۋرالى» جانە «جول ءجۇرىسى تۋرالى» زاڭدارى بار.
- «ەلەكتروموبيل» جانە «ەلەكترقۋاتتاۋ ستانسياسى» دەگەن جاڭا ۇعىمدار ەنگىزىلەدى.
- جولداردى جوبالاعان كەزدە ەلەكترقۋاتتاۋ ستانسيالارىن ورنالاستىرۋ ءۇشىن بولەك ورىندار بولىنەدى.
- ەلەكترقۋاتتاۋ ستانسيالارى جول بويىنداعى سەرۆيس وبەكتىلەرىنە جاتقىزىلادى جانە ولار ءۇشىن جەكەلەگەن ورىندار بەلگىلەنەدى.
- اۋماقتى ەگجەي-تەگجەيلى جوسپارلاۋ جوباسىندا ەلەكترقۋاتتاۋ ستانسيالارىن ورنالاستىرۋ ءۇشىن رەزەرۆكە ورىندار قويىلادى، تۇرعىن جانە قوعامدىق ايماقتاردى قوسا العاندا.
- اۋەجايلاردا، ۆوكزالداردا، ساۋدا وبەكتىلەرىندە، تەاترلاردا، كينوتەاترلاردا جانە باسقا دا ورىنداردا ەلەكترقۋاتتاۋ ستانسيالارى بار تاكسيلەردىڭ تۇراعىن ۇيىمداستىرۋ جانە جابدىقتاۋ جونىندەگى فۋنكسيالار بەلگىلەنەدى.
- ەرەكشە قورعالاتىن اۋماقتاردى جوسپارلاۋ جوباسىندا ەلەكترقۋاتتاۋ ستانسيالارى بار تۇراقتار ءۇشىن ورىنداردى ورنالاستىرۋ.
- ەلەكتروموبيلدەردىڭ تۇراعى ءۇشىن ارنايى بولىنگەن ورىنداردى ءبولۋ.
- ەلەكتروموبيلدەردىڭ يەلەرىن تۇراقتا اقى تولەۋدەن بوساتۋ.
زاڭدى ەكىنشى وقىلىمدا تالقىلاۋ كەزىندە دەپۋتاتتار قوسىمشا تۇزەتۋلەر ەنگىزدى. بۇل ەلەكترقۋاتتاۋ ستانسيالارىن ورنالاستىرۋ ءۇشىن ورتاق پايدالانۋداعى جەرلەردەن ۋاقىتشا جەر پايدالانۋعا جەر ۋچاسكەلەرىن بەرۋ جانە اكىمدىكتەرگە ەلەكترقۋاتتاۋ ستانسيالارىن ورنالاستىرۋ شەشىمدەرىن قابىلداۋ قۇزىرەتىن بەرۋ ماسەلەلەرىن قامتيدى. سونىمەن قاتار، ەلەكتر ەنەرگياسىن قوسۋ، پايدالانۋ جانە تۇتىنۋ كەزىندە ەلەكترقۋاتتاۋ ستانسيالارىنىڭ ءقاۋىپسىز جۇمىس ىستەۋى بويىنشا تالاپتار بەلگىلەندى.
دەپۋتاتتار «اۆتوموبيل كولىگى تۋرالى» جانە «جول ءجۇرىسى تۋرالى» زاڭدارىنا دا ءتيىستى تۇزەتۋلەر ەنگىزدى. ولاردىڭ ىشىندە اۆتوبۋستار مەن تروللەيبۋستار جۇرگىزۋشىلەرىنىڭ جاسىن جيىرما ءۇش جاسقا دەيىن تومەندەتۋ جانە كەمىندە ءۇش جىل جۇمىس ءوتىلىن بەلگىلەۋ ۇسىنىلدى. «D1» كىشى ساناتىنداعى جۇرگىزۋشىلەر ءۇشىن جۇمىس ءوتىلى كەمىندە ءبىر جىل بولۋى ءتيىس.
بۇل زاڭنىڭ قابىلدانۋى قازاقستانداعى ەكولوگيالىق تازا كولىكتەردىڭ دامۋىنا ۇلكەن سەرپىن بەرەدى جانە ەلدىڭ ەكولوگيالىق جاعدايىن جاقسارتۋعا باعىتتالعان ماڭىزدى قادام بولىپ تابىلادى.
ەستەرىڭىزگە سالا كەتسەك بۇعان دەيىن "كولىك مينيسترلىگى مەن Car Park Transformer Limited ىنتىماقتاستىق تۋرالى كەلىسىمگە قول قويعانى تۋرالى" جازعان بولاتىنبىز.