قازاقستاندا جاڭارتىلاتىن ەنەرگيا كوزدەرى قارقىندى دامىپ كەلەدى، الايدا ولاردىڭ تيىمدىلىگى جەلدىڭ كۇشى، اۋا رايى جاعدايلارى جانە كۇن ساۋلەسىنىڭ قولجەتىمدىلىگى سياقتى فاكتورلارعا بايلانىستى وزگەرىپ وتىرادى. ەلەكتر جەلىسىنىڭ تۇراقتىلىعىن قامتاماسىز ەتۋ ءۇشىن كومىر جانە اتوم ستانسيالارى سياقتى سەنىمدى، تۇراقتى بازالىق كوزدەر قاجەت.
اتوم ەلەكتر ستانسيالارى (اەس) سالۋ – ەلەكتر ەنەرگياسىنىڭ تاپشىلىعىن قىسقارتۋعا، تاريفتەردىڭ ءوسۋىن تەجەۋگە جانە ەكولوگيانى جاقسارتۋعا مۇمكىندىك بەرەتىن سەنىمدى شەشىمدەردىڭ ءبىرى. كومىر ستانسيالارى ەكولوگياعا جانە ادام دەنساۋلىعىنا كەرى اسەرىن تيگىزەتىندىكتەن، اتوم ەنەرگەتيكاسى ەكولوگيالىق تۇرعىدان الدەقايدا ءتيىمدى بولىپ تابىلادى.
اەس ەلەكتر ەنەرگياسىنىڭ قۇنى مەن ءوندىرىس تۇراقتىلىعى بويىنشا وڭتايلى تاڭداۋ رەتىندە قاراستىرىلادى. سونىمەن قاتار، اەس ەلدىڭ ەنەرگەتيكالىق تاۋەلسىزدىگىن نىعايتادى، سەبەبى ول وتىن يمپورتىنا تاۋەلدىلىكتى ازايتادى. بۇل ەلەكتر ەنەرگياسىنىڭ باعاسىن باقىلاۋدا ۇستاۋعا كومەكتەسەدى جانە سىرتقى فاكتورلارعا تاۋەلدىلىكتى تومەندەتەدى.
ۇزاق مەرزىمدى پەرسپەكتيۆادا اەس پايدالانۋ شىعىندارى جاڭارتىلاتىن ەنەرگيا كوزدەرىنە قاراعاندا تومەن بولۋى مۇمكىن. سەبەبى اتوم ستانسيالارى ۇزاق ۋاقىت بويى تۇراقتى مولشەردە ەلەكتر ەنەرگياسىن وندىرەدى، ال ولاردىڭ جۇمىس ىستەۋ مەرزىمى بىرنەشە ونجىلدىققا سوزىلادى. وسىلايشا، اەس سالۋ جانە پايدالانۋ ەلەكتر ەنەرگياسىنىڭ تاريفتەرىن تۇراقتاندىرۋعا ەلەۋلى ىقپال ەتە الادى، بۇل ءوز كەزەگىندە تۇتىنۋشىلار ءۇشىن ۇزاق مەرزىمدى تۇراقتى باعانى قامتاماسىز ەتەدى.
قورىتا ايتقاندا، اەس قازاقستان ءۇشىن ەلەكتر ەنەرگياسىنىڭ قولجەتىمدىلىگىن ارتتىرىپ قانا قويماي، ەكولوگيانى جاقسارتۋعا جانە ەلدىڭ ەنەرگەتيكالىق تاۋەلسىزدىگىن نىعايتۋعا مۇمكىندىك بەرەدى.