ەلدەگى تەرى وندىرۋشىلەر يلەۋگە قاجەتتى ءىرى قارا مالدىڭ تەرىسىن تاپپاي تۇرالاپ قالعان.
سەبەبى مىڭداعان دانا سيىر تەرىسى سىرت ەلدەرگە شيكىزات رەتىندە كەتەدى. ال قويدىڭ تەرىسى بولسا، شەتەلگە وتپەيدى. امالى قالماعان شارۋالار شيكىزاتتى قوقىسقا تاستايدى، دەپ حابارلايدى Almaty-akshamy.kz
بۇرىن ۇساق مال تەرىسىنەن دە تابىس تاۋىپ كەلگەن شارۋالار ءقازىر ونى تيىنعا بولسا دا الاتىن ادام تاپپاي الەك. تىعىرىققا تىرەلگەن تەرى وندىرۋشىلەر مەن شارۋالار بيلىكتەن كومەك سۇرايدى.
تاۋ بولىپ ۇيىلگەن تەرىنى قوقىس پوليگونىنا جونەلتەدى. اينالا ولەكسە ساسىماس ءۇشىن، تەرى توگىلگەن جەردى كۇن سايىن ورتەپ تۇرۋعا تۋرا كەلەدى. مال تەرىسى بۇرىن تابىستىڭ ءبىر كوزى بولسا، بۇگىندە شارۋالارعا قوسىمشا جۇك بولىپ تۇر.
«تەرىسى ەشكىمگە كەرەك بولماعاننان كەيىن كۇندەلىكتى قوقىسقا كەتەدى. الىپ جاتقان ەشكىم جوق. قابىلداپ جاتقان ەش جەر جوق. وسى ايماقتا قانشا وسىنداي شارۋالار بار. بارىنىكى قوقىستا جاتىر»، - دەيدى قوزىباي اتباعاروۆ ەسىمدى شارۋا.
وتاندىق وندىرۋشىلەر دە قوي تەرىسىن وڭدەۋگە قۇلىقسىز. ويتكەنى ودان جاسالعان جارتىلاي فابريكاتقا شەتەلدەن سۇرانىس جوق. ال، ەلىمىزدە يلەنگەن قوي تەرىسىنەن بۇيىم جاسايتىن وتاندىق كاسىپورىن جوق. ەسەسىنە جىلىنا ەلىمىزدە ەكى جارىم ملن دانادان استام ءىرى قارا مال تەرىسى جينالادى. ونىڭ ءوزىن دەلدالدار اقشاسى ءۇشىن شەتەل اسىرۋعا بەيىمدەلىپ العان.
«اۋسىلعا بايلانىستى تەرىنى رەسەيگە شىعارمايتىن. ەندى ءقازىر اۋسىلدىڭ كارانتين ۋاقىتى ءبىتىپ، شەكارا اشىلعاننان كەيىن تەرىنىڭ بارلىعى سول رەسەيدىڭ تاراپىنا قاراي اقىرىن اۋىپ كەتىپ جاتىر. سول سەبەپتى مەن تىكەلەي وزىمە قاتىستى الاتىن بولسام، زاۋىتتا ءقازىر تەرى جوق. تەرى بولماعان سوڭ، زاۋىتىمىز توقتاپ تۇر»، - دەيدى قازاقستانداعى تەرى وندىرۋشىلەر قاۋىمداستىعىنىڭ ءتوراعاسى نۇرمان نۇپتەكەيەۆ.
ەلىمىزدە ءىرى قارا مال تەرىسىن وڭدەيتىن ءىرىلى-ۇساقتى 10 كاسىپورىن بار. ولاردىڭ كوپشىلىگى بىردە ىستەپ، بىردە توقتاپ تۇر. ءبىرىنىڭ توزىعى جەتسە، بىرىنە شيكىزات جەتىسپەيدى. ال، وسى ۋاقىت ارالىعىندا دايىن تەرىدەن بۇيىم جاسايتىن ءوندىرىس ورىنى ىسكە قوسىلماپتى. ءقازىر تەرى ءوندىرۋ سالاسىنىڭ فۋكسيالارىن يندۋستريا مينيسترلىگىنەن اۋىل شارۋاشىلىعى مينيسترلىگىنە تولىق وتكىزۋ جۇمىستارى جۇرۋدە.
«ەلىمىزدە بىلعارىدان بۇيىم جاسايتىن كاسىپورىننىڭ نارىقتاعى ۇلەسى نەبارى 4 پايىزدى عانا قۇرايدى. ءقازىر بىزدە ەكى زاۋىت تولىق جۇمىس ىستەپ تۇر. ونىڭ ءوزى كەڭەستىك كەزەڭنەن قالىپ، قايتا جوندەۋدەن وتكەندەر. ال، جاڭا ءوندىرىس ورىنى اشىلمادى»، - دەيدى ق ر ييدم اۋىلشارۋاشىلىعى ءوندىرىسى باسقارماسىنىڭ ساراپشىسى ايگەرىم يسابەكوۆا.
ءقازىر تەرى وندىرۋشىلەر قاۋىمداستىعى مەن اۋىل شارۋاشىلىعى مينيسترلىگى تەرىدەن جەلاتين جاسايتىن زاۋىت قۇرىلىسىن جۇرگىزۋ ءۇشىن كەلىسسوزدەر جۇرگىزۋدە. ساباقتى ينە ساتىمەن شىقسا، ەلدەگى بۇكىل مال تەرىسى تاماق وندىرىسىنە باعىتتالماق.