قازاقستاندا 4 ميلليوننان استام كولىك بار
سونىڭ جارتىسى ابدەن توزعان، دەپ حابارلايدى Almaty-akshamy.kz.
24.kz حابارلاۋىنشا، ەسكى اۆتوموبيلدەردىڭ باسىم بولىگى وڭتۇستىك وڭىرلەردە كەزدەسەدى. ماماندار سونىڭ اسەرىنەن ەكولوگيا ءبۇلىنىپ، اۋا لاستانىپ جاتقانىن ايتۋدا. ويتكەنى ەلدەگى زياندى ءتۇتىننىڭ 90 پايىزى كولىكتەردەن بولىنەدى.
قايسار جاميحانوۆ ەسىمدى ازامات 31 جىل بۇرىن شىعارىلعان ەسكى "تايوتا" اۆتوكولىگىن ءمىنىپ ءجۇر. «جۇرگەنىنەن تۇرعانى كوپ كولىكتىڭ ماشاقاتى ابدەن قاجىتتى»،- دەيدى ول. سەبەبى، ەسكى كولىكتىڭ كاۋىپسىزدىگى تومەن، بۇزىلۋعا بەيىم ءارى قىزمەت كورسەتۋ قۇنى قىمبات. ال جاڭاسىن الۋعا قاراجاتى قات.
«تايوتا كارينە ە، 1992 جىلعى ماشينا. 31 جىل بولعان. ءجۇرمىز وسىمەن، جاڭا ماشينا الۋعا مۇمكىندىك جوق. وسىلاي قينالىپ ءجۇرمىز، ونىڭدا بولەكشەتى قىمبات»، - دەيدى قايسار جاميحانوۆ.
ءتىپتى شىققانىنا 10 جىل بولعان كولىكتەر ءبىزدىڭ نارىق ءۇشىن جاڭا كولىكتەردىڭ قاتىرىندا بولعانىمەن، كەي شەت ەلدەردە ولاردى ەسكى دەپ سانايدى. بىزدە بۇل سەكىلدى اتى جاڭا بولعانىمەن زاتى ەسكى كولىكتەر كوپ. 4 ملنننان اساتىن ءاۆتوموبيلدىڭ تەك 600 مىڭى عانا جاڭا. شىققانىنا 7-10 جىل بولعان كولىكتەردىڭ سانى - 581 مىڭ. 10-20 جىل ارالىعىندا قولدانىستاعى كولىكتەر - 913 مىڭ. ال 20 جىلدان ەسكى كولىكتەر 2 ميلليونعا جۋىقتادى.
ەلدە 4 ملننان اسا كولىك بولسا، ولاردىڭ 20 جىلدان اسقاندارى — 1 ملن 999 مىڭ
10-20 جىل — 913 مىڭ
7-10 جىل — 581 مىڭ
3-7 جىل — 259 مىڭ
1-3 جىل — 382 مىڭ
اسىرەسە، جامبىل، الماتى، تۇركىستان وبلىستارىنا توزىعى جەتكەن اۆتوموبيل كوپ. وزگە وڭىرلەردەگى كورسەتكىش تە ءماز ەمەس. مۇنى دارىگەرلەر شىر-پىر بولىپ، كوپتەن بەرى ايتىپ ءجۇر. «ەكولوگيالىق تالاپتاردان ادا اۆتوكولىكتەردى ازايتپاساق، تىنىس الۋ جولىنداعى قاتەرلى ىسىك كوبەيەدى»،- دەيدى ولار. ەكولوگتار دا بۇل پىكىرمەن كەلىسەدى.
«ولاردان بولىنەتىن ازود وكسيدى، ۇلكەن جىلدامدىقپەن جۇرەتىن بولسا قاتتى بولشەكتەر ءتۇزىلۋى مۇمكىن. اسىرەسە ديزەلمەن جۇرەتىن ماشينالاردا. سوندىقتان بۇل تۇستا ءبىرىنشى كەزەكتە تەحوسموتردان دۇرىس وتكىزۋ كەرەك. وتىرىك تەحاسموتر وتكىزۋ، اقشامەن وتكىزۋ دەگەندى اۋىزدىقتاۋ كەرەك. كاتاليزاتورلىق بلوكتىڭ بولۋىن قامتاماسىز ەتۋ كەرەك»، - تاجىريبەشىل ەكولوگتار قاۋىمداستىعىنىڭ ءتورايىمى لاۋرا مالىكوۆا.
جاڭا كولىكتىڭ ەكولوگياعا زيانى از ەكەنى بەلگىلى. الايدا ەكىنىڭ ءبىرى جاڭا تۇلپاردى تىزگىندەۋگە مۇمكىندىگى جوق. وتاندىق اۆتويندۋستريا سالاسى سۇرانىستى تولىق قامتاماسىز ەتىپ وتىر دەۋ دە قيىن. اۆتووندىرۋشىلەر، «ەكولوگياعا ءتيىمدى، قوزعالتقىش كولەمى كىشى كولىكتەردى قۇراستىرۋدامىز»،- دەيدى. بيىل سۋ جاڭا اۆتوموبيلگە سۇرانىس 31،1 پايىزعا ارتقان. العاشقى التى ايدا 66 مىڭ كولىك ساتىلعان.