قازاقستاندا ونەركاسىپتىك گرانتتار بەرىلەدى
اتالمىش گرانت وتاندىق كاسىپورىنداردى ىنتالاندىرۋدىڭ وزىندىك جاڭا قۇرالىنا اينالادى، دەپ حابارلايدى Almaty-akshamy.kz Qazaqtv.com cايتىنا سىلتەمە جاساپ
بۇل تۋرالى سەنات وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ حابارلادى. ونىڭ ايتۋىنشا، اقشا ءوندىرىستى تەحنولوگيالىق جاعىنان جاڭعىرتۋعا بولىنەدى. ياعني ەندى كاسىپكەرلەرگە ءوز جابدىقتارىن جاڭارتۋعا مەملەكەت كومەكتەسەدى.
بۇل شارا شيكىزات، جوعارى تەحنولوگيالىق تاۋارلار جانە اسا سۇرانىسقا يە ونىمدەر شىعاراتىن وندىرۋشىلەرگە قاتىستى. جاۋاپتى سالا باسشىسىنىڭ اقپاراتى بويىنشا، قايتا وڭدەۋدى جاقسارتۋعا باسا نازار اۋدارىلادى.
مينيستر رەسپۋبليكاداعى كوپتەگەن زاۋىت كەڭەس وداعى كەزىنەن بەرى جاڭارتىلماعانىن، سوندىقتان دا ەڭبەك ونىمدىلىگى تومەن ەكەنىن ايتتى. الايدا كاسىپورىنداردىڭ ورىنداۋى ءتيىس ءوز مىندەتتەرى بولادى.
«ولار وزدەرى مالىمدەگەن ءونىمنىڭ ءوندىرىس كولەمى، ساپاسى، ەڭ باستىسى ەكسپورتقا باعدارلانۋى بويىنشا جاقسى كورسەتكىشتەرگە قول جەتكىزۋى ءتيىس. ياعني ءبىز قولداۋ كورسەتكەن زاۋىتتار ەڭ جوعارى، حالىقارالىق ستاندارتتارعا سايكەس كەلەتىن جانە باسەكەگە قابىلەتتى ءونىم شىعارۋى كەرەك. ەگەر ولار شارتتاردى ورىنداماسا، مەملەكەت تاراپىنان جۇمسالعان قاراجاتتى بيۋدجەتكە قايتارۋعا ءماجبۇر بولادى»، - دەدى ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ.