بۇل - ازىق-تۇلىك قاۋىپسىزدىگىنىڭ تومەندەۋىنە اكەلىپ سوقتىراتىن فاكتور.
سول سەبەپتى قازاقستاندىق فەرمەرلەر مەملەكەت باسشىسىنا اشىق حات جولدادى، دەپ حابارلايدى Almaty-akshamy.kz
قازاقستان فەرمەرلەرى قاۋىمداستىعى پرەزيدەنت پەن پرەمەر-مينيستردىڭ اتىنا حات جولداپ، اۋىل شارۋاشىلىعى تەحنيكاسىن جەڭىلدىكپەن ليزينگكە بەرۋ تەتىگىن ەنگىزۋدى سۇرادى.
فەرمەرلەر الدىمەن ەگىن جيناۋ ناۋقانىنىڭ تامىز ايىنىڭ ءبىرىنشى جارتىسىندا باستالاتىنىن ەسكە سالدى. ال اۋىل شارۋاشىلىعى تەحنيكاسىن جاپپاي جاڭارتۋ مۇمكىن بولماي وتىر.
سەبەبى قولدانىستاعى ليزينگ باعدارلامالارىنىڭ قاراجاتى تاۋسىلىپ قالعان. بۇگىندە تەحنيكانىڭ توزۋ دەڭگەيى 80 پايىزعا جەتكەن.
«ماسەلەنىڭ ماڭىزدىلىعىن جانە ەگىن جيناۋ كەزەڭىنىڭ جاقىنداپ كەلە جاتقاندىعىنا بايلانىستى قىسىلتاياڭ مەرزىمدەردى ەسكەرە وتىرىپ، ءسىزدىڭ جاردەمىڭىزدى، اتاپ ايتقاندا، يندۋستريا جانە ينفراقۇرىلىمدىق دامۋ مينيسترلىگىنە، ەكولوگيا، گەولوگيا جانە تابيعي رەسۋرستار مينيسترلىگىنە، اۋىل شارۋاشىلىعى مينيسترلىگىنە جانە «بايتەرەك» ۇبح» اق-نا باستاپقى جارناسىز، سىياقى مولشەرلەمەسى 3%-عا دەيىن، «جاسىل دامۋ» اق قاراجاتى ەسەبىنەن قارجىلاندىرۋ كولەمى 50 ميلليارد تەڭگە بولاتىن اۋىل شارۋاشىلىعى تەحنيكاسىن جەڭىلدىكپەن ليزينگتەۋ باعدارلاماسىن ىسكە قوسۋ تۋرالى ءتيىستى تاپسىرمالار بەرۋدى سۇرايمىز»، - دەيدى فەرمەرلەر.
ولاردىڭ ايتۋىنشا، وتاندىق اۋىل شارۋاشىلىعى تەحنيكاسىن جەڭىلدىكپەن ليزينگتەۋ تەتىگىن جەدەل ىسكە قوسۋدىڭ ناتيجەسىندە ەگىن جيناۋ ناۋقانىنا قىسقا مەرزىمدە 1000 بىرلىكتەن استام تراكتور مەن كومباين پاركىن جاڭارتۋعا مۇمكىندىك بولادى.
«اعىمداعى جىلعى كۇزگە دەيىن جۇمىس ىستەيتىن باعدارلامانىڭ بولماۋى ساپالى ءونىمنىڭ جوعالۋى قاۋپىنە جانە ەلىمىزدىڭ ازىق-تۇلىك قاۋىپسىزدىگىنىڭ جالپى دەڭگەيىنىڭ تومەندەۋىنە اكەلىپ سوقتىرادى»، - دەپ اتاپ كورسەتتى ماماندار.