لۋدومانياعا شالدىققاندار كوبەيىپ بارادى.
وتكەن جىلدىڭ وسى كەزەڭىندە الماتىداعى پسيحيكالىق دەنساۋلىق ورتالىعىنىڭ سەنىم تەلەفونىنا 80-نەن اسا قوڭىراۋ تۇسكەن. ال بيىل 150-گە جۋىق ادام كومەك سۇراعان، دەپ حابارلايدى Almaty-akshamy.kz 24.kz-كە سىلتەمە جاساپ.
سوندىقتان، قۇمار ويىنداردىڭ جارناماسىن جۇگەندەۋ كەرەك. ولاي بولماعان جاعدايدا لۋدومانداردىڭ قاتارى تىپتەن ارتىپ كەتەدى. ورتالىق ماماندارىنىڭ پىكىرى وسىنداي.
دارىگەرلەردىڭ ايتۋىنشا، لۋدومانياعا شالدىققان ادامنىڭ ەڭ ءبىرىنشى مىنەز-قۇلقى وزگەرەدى. قاراپايىم سوزبەن ايتساق، ۇنەمى سىركەسى سۋ كوتەرمەي تۇرادى. اشۋلانشاق بولىپ كەتەدى. ءتۇن ۇيقىسى بۇزىلادى. وعان قوسا، اسقا زاۋقى بولمايدى. ەشكىممەن سويلەسپەيدى. وسى بەلگىلەر بايقالعان كەزدە مامانعا قارالۋ كەرەك. جاقىندارى قولۇشىن سوزۋى ءتيىس. ايتپەسە ونىڭ سوڭى قيىن جاعدايعا اكەلەدى، دەپ دابىل قاعىپ وتىر دارىگەرلەر. مۇنى لۋدومانياعا شالدىققان جىگىت اعاسى دا راستايدى. ول ءاتى-جونىن ايتپاۋىمىزدى ءوتىندى. جاسى 50-گە جۋىقتاپ قالعان. قۇمار ويىندى 5 جىل بويى ويناعان. وزدىگىنەن قويا الماعان سوڭ پاۆلودارداعى پسيحيكالىق دەنساۋلىق ورتالىعىنىڭ وڭالتۋ ورتالىعىنا كەلگەن. 5 اي بولدى وسىندا. تاعى 2 اي جاتادى. ويىننىڭ كەسىرىنەن جۇمىسىنان شىعىپ قالعان. تۋعان-تۋىس، دوس-جاراندارىمەن اراز. ەندى مۇلدەم قويامىن،-دەپ وتىر. ول كەڭەسشىلەر كۋرسىن وقىپ، ءوزى سياقتى قۇمار ويىنعا كىرىپ كەتكەن ادامدارعا كومەكتەسكىسى كەلەدى.
«ءوزىمىزدىڭ پاتولوگيامىز، قيىندىق ىزدەپ سان مىڭ جەردەن كەتىپ قالعىمىز كەلەدى. سونى ويلاپ نەشە ءتۇرلى وي كەلەدى. سوندىقتان مامانمەن سويلەسۋ كەرەك. ولار ىشكى دۇنيەڭدەگى نارسەلەردى سىرتقا الىپ شىعىپ، جۇمىس ىستەيدى. سوندا ويلايسىڭ شىعىپ كەتسەڭ ويىنعا بارار ەدىم دەپ. وسى جەرگە كەلىپ ساناعان كەزدە 80 ملن تەڭگە ۇتىلىپپىن»، - دەيدى لۋدومان.
لۋدومانيانىڭ جاس تالعامايتىنىن الماتىداعى پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆ تە راستاپ وتىر. كومەك سۇراپ كەلگەندەردىڭ قاتارىندا جاسوسپىرىمنەن باستاپ، زەينەتكەرگە دەيىن بار. قۇمار ويىنعا تاۋەلدىلىكتەن ارىلا الماي جۇرگەن جاندارعا دەر كەزىندە كومەك كورسەتپەسە، وز-وزىنە قول جۇمساۋى مۇمكىن، - دەيدى. سوڭعى كەزدە مۇنداعى سەنىم تەلەفونىنا حابارلاساتىندار كوبەيگەن. جاقىن ارادا ءبىر جاس جىگىت كەلىپ، مۇڭىن شاققان.
«سوندا ول ايتىپ وتىر: «مەنىڭ قارىزىم كوبەيىپ كەتتى. مەنىڭ جۇرتتىڭ بەتىنە قاراۋعا دا بەتىم جوق. ونى ءيا، قۇتىلايىن دەسەم جۇمىسىم جوق. ولار ماعان زۆونداپ، كۇندە ىزدەيدى. سوندىقتان مەن بۇدان ءبىرجولا قۇتىلعىم كەلىپ، وزىمە قول جۇمساعىم كەلدى» - دەيدى. ءسويتىپ، بىزگە، ءبىزدىڭ سەنىم تەلەفونعا حابارلاسىپ، سوسىن ءبىزدىڭ پسيحولوگ، پسيحوتەراپيەۆت ماماندارعا كەلىپ، وسى جەردە ەم قابىلدادى»، - دەيدى پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆ.
پسيحوتەراپيەۆت ماريا توكاريەۆا لۋدومانيانىڭ دا بىرنەشە كەزەڭى بولاتىندىعىن ايتادى. باس كەزىندە ويىنشى ءوزىن قاداعالاپ جۇرگەندەي بولادى. ءبىراق ۋاقىت وتە قۇمار ويىنسىز تۇرا المايتىن حالگە جەتىپ، ونىڭ جەتەگىندە كەتكەنىن بىلمەي قالادى، - دەيدى.
«ويىندى ءجيى ويناعان سايىن ءوزىن باسقارۋدى، اقشاسىن قالاي جۇمساۋ قاجەتتىگىن قولدان شىعارىپ العانىن ۇقپاي قالادى. كەيىن ونى ۇرەي بيلەي باستايدى. ول بارلىق ەموسيانى ويىننان العىسى كەلەدى. ءسويتىپ، جۇمىسىندا، وتاباسىندا تۇيىتكىلدەر پايدا بولادى. قارىزعا باتادى. ەڭ سوڭعى ساتىدا وز-وزىنە ەسەپ بەرە المايدى. ويىننىڭ كەسىرىنەن ءبارى كەرى كەتەدى. ارينە، بۇل تۇڭعيىقتان شىعۋ ءۇشىن ماماننىڭ كومەگى قاجەت»، - دەيدى پسيحوتەراپيەۆت ماريا توكاريەۆا.
سوڭعى زەرتتەۋلەرگە سايكەس، ەلىمىزدە ءاربىر بەسىنشى جاس لۋدومان، قۇمار ويىننىڭ قۇرىعىنا ىلىنگەن. وسى جىلدىڭ 4 ايىندا بۋكمەكەرلىك كومپانيالاردىڭ اينالىمىنا 100 ميلليارد تەڭگەدەن استام قاراجات تۇسكەن. بۇل ءجايتتى بۇدان ءارى ۋشىقتىرماي رەتتەگەن ءجون. ءقازىر پارلامەنت ءماجىلىسىنىڭ دەپۋتاتتارى لۋدومانياعا قاتىستى زاڭ جوباسىن ازىرلەپ جاتىر.