قايتا ۆاكسينالاۋ، بيزنەس نىساندارىنىڭ جۇمىسى جانە ۇجىمدىق يممۋنيتەتتى قالىپتاستىرۋ سۇراقتارى ۆاك وتىرىسىندا قارالدى
ق ر پرەمەر-مينيسترىنىڭ ورىنباسارى ەرالى توعجانوۆتىڭ توراعالىعىمەن ق ر اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى ءوتتى، دەپ حابارلايدى Almaty-akshamy
دەنساۋلىق ساقتاۋ ءمينيسترى الەكسەي سوي ەلدەگى سانيتارلىق-ەپيدەميولوگيالىق جاعداي تۋرالى بايانداما جاسادى.
سوڭعى ەكى اپتادا COVID-19-بەن اۋىرۋ دەڭگەيى 30%-عا، ءولىم-جىتىم 40%-عا تومەندەدى.
ۆاك وتىرىسىندا ءبىرقاتار ماڭىزدى شەشىم قابىلداندى: COVID-19-عا قارسى ۇجىمدىق يممۋنيتەتتى قالىپتاستىرۋ ماقساتىندا ۆاكسينالاۋعا جاتاتىن كونتينگەنت 9،9 ملن-نان 11،4 ملن ادامعا دەيىن ۇلعايتىلدى، بۇل ددسۇ ۇسىنىمدارىنا سايكەس ۇجىمدىق يممۋنيتەتكە 60% دەڭگەيىندە قول جەتكىزۋگە مۇمكىندىك بەرەدى؛
حالىقتى قايتا ۆاكسينالاۋدى اعىمداعى جىلى قاراشانىڭ ءۇشىنشى ونكۇندىگىنەن كەلەسى ساناتتاعى ادامدار ءۇشىن باستاۋ جوسپارلانىپ وتىر: تاۋەكەل توپتارى (مەديسينا قىزمەتكەرلەرى، پەداگوگتەر، مەديسينالىق-الەۋمەتتىك مەكەمەلەر مەن جابىق مەكەمەلەردىڭ پەرسونالى مەن كونتينگەنتى، كۇش قۇرىلىمدارىنىڭ قىزمەتكەرلەرى)؛ 60 جاستان اسقان ادامدار؛
وزدىگىنەن زەرتتەۋلەردەن وتكەن جانە كۆي-عا قارسى انتيدەنەلەرگە تەرىس تەست ناتيجەسى بار ادامدار؛
«ASHYQ» جوباسىنا قاتىساتىن كاسىپكەرلىك نىساندارىنىڭ جۇمىس ۋاقىتى ۇلعايدى، «جاسىل ايماقتا» – ساعات 03:00-گە دەيىن، «ASHYQ» جوباسىنىڭ كوشباسشىلارى ءۇشىن – ساعات 05:00-گە دەيىن؛
«سارى ايماقتا» – ساعات 01:00-گە دەيىن، «ASHYQ» جوباسىنىڭ كوشباسشىلارى ءۇشىن – ساعات 03:00-گە دەيىن؛
ءۇندىستان جانە فيليپپينمەن ءوزارا ۆاكسينالاۋ ءتولقۇجاتىن تانۋ ىسكە اسىرىلدى، ناتيجەسىندە قازاقستان رەسپۋبليكاسى 15 ەلمەن ۆاكسينالاۋ پاسپورتىن تانۋ تۋرالى كەلىسىمگە قول جەتكىزدى (تۇركيا، ۆەنگريا، گرۋزيا، قىرعىزستان، مولدوۆا رەسپۋبليكاسى، موڭعوليا، تايلاند، بەلارۋس رەسپۋبليكاسى، ارمەنيا، يران، سان-مارينو، ارگەنتينا، ەستونيا، ءۇندىستان مەن فيليپپين)؛ كارانتيندىك شەكتەۋلەر كەزەڭىندە ق ر مەملەكەتتىك شەكاراسىن كەسىپ ءوتۋ تارتىبىنە ق ر اۋماعىنا ەركىن كىرۋ (ۆاك شەشىمىنسىز) بولىگىندە وزگەرىستەر ەنگىزىلدى: تۋىستىق فاكتىسىن راستاي وتىرىپ، ق ر ازاماتتارىنىڭ تۋىستارى بولىپ تابىلاتىن شەتەلدىكتەرگە؛ ق ر ازاماتتارىنىڭ وتباسى مۇشەلەرى بولىپ تابىلاتىن شەتەلدىكتەرگە اۋىر ناۋقاستانعاندارعا كۇتىم جاساۋ ءۇشىن، ولاردىڭ ىلەسىپ جۇرەتىن جۇبايلارى مەن كامەلەتكە تولماعان بالالارىنا، سونداي-اق جەرلەۋ راسىمىنە كەلگەندەرگە.
ۆەدومستۆوارالىق كوميسسيانىڭ وتىرىسىن قورىتىندىلاي كەلە، ەرالى توعجانوۆ ءبىرقاتار ناقتى تاپسىرما بەرىپ، ۆاك قاتىسۋشىلارىنىڭ الدىندا تاياۋ ۋاقىتتاعى باسىم مىندەتتەردى بەلگىلەدى.