2020 جىلدان بەرى ەل بويىنشا قيىندىققا تاپ بولعان 17 مىڭ ازاماتقا جاڭا قۇجات بەرىلگەن.
مامانداردىڭ ايتۋىنشا، بۇل ىستە زاڭگەرلەر مەن وڭالتاۋ ورتالىقتارىنىڭ كومەگى وراسان زور. سەبەبى ادامدار كوبىنە قۇجاتىن نە جوعالتىپ الادى، نە ۇرلاتىپ الاتىن كورىنەدى، دەپ حابارلايدى Almaty-akshamy.kz 24.kz-كە سىلتەمە جاساپ.
اناستاسيا بوگدانوۆا 24 جىل بويى ءتولقۇجاتسىز ءومىر ءسۇرىپ كەلەدى. وسىدان 18 جىل بۇرىن اناسىمەن بىرگە رەسەيدەن كوشىپ كەلگەن. اناسى قۇجاتتارىن جوعالتىپ العان. ەندى قۇجاتسىز ءجۇرۋدىڭ ابدەن قيىندىعىن كورگەن باسىنان وتكەن جاعدايىمەن ءبولىستى،
«تۋۋ تۋرالى كۋالىگىم بولدى. ونى انام مەن وگەي اكەم ىشىمدىككە سالىنعاندا جوعالتتى. مەكتەپ بىتىرگەننەن كەيىن وقۋعا ءتۇسۋ ارمانىم ەدى. ءتولقۇجات بولماعان سوڭ، مەنى قابىلدامادى. جۇمىسقا تۇرايىن دەسەم، وندا دا جەكە باستى راستايتىن كالىكتى سۇرايدى. ءناپاقامدى تاۋىپ، ءۇش باۋىرىمدى اسىراۋ ءۇشىن قارا جۇمىسشى بولدىم. كەلىسىمشارتسىز جۇمىس ىستەدىم. ودان بالام دۇنيەگە كەلدى. ونىڭ دا قۇجاتى جوق. جاقىندا ءولىم مەن ءومىر اراسىندا بولدىم. دارىگەردى شاقىرتىپ، ەم الايىن دەسەك، قۇجاتسىز قابىلدامايتىنىن ايتادى»، - دەيدى اناستاسيا بوگدانوۆا.
اناستاسيا بوگدانوۆانىڭ ايتۋىنشا، ءتولقۇجاتسىز ءومىر – ءومىر ەمەس. ول جۋىردا اسپاز بولىپ، ايىنا 50 مىڭ تەڭگە تابامىن دەپ قالا شەتىندەگى اۋىلعا بارادى. الايدا مال باعىپ، قارا جۇمىس ىستەگەن. قۇرعاق ۋادەگە سەنگەن جانعا ەڭبەكاقى دا تولەنبەگەن. بارار جەر، باسار تاۋى بولماعان سوڭ، امالسىز بەس اي زاڭسىز ەڭبەككە كونگەن.
وڭالتۋ ورتالىعىنا شاراسىز كۇيگە تۇسكەن ازاماتتار كومەك سۇراپ بارادى. مامانداردىڭ ايتۋىنشا، 100 ادامنىڭ 10%-ى قۇجات ماسەلەسىمەن جۇگىنەدى.
«بىزگە تەك قازاقستاننىڭ ازاماتى ەمەس، باسقا شەت مەملەكەتتىڭ ازاماتتار دا كەلەدى عوي. ولاردىڭ قۇجاتتارىنا جۇگىنۋ ءۇشىن، ەلشىلىكتەرگە بىرگە بارامىز. ناستيانىڭ جاعدايى كىشكەنە قيىن بولىپ جاتىر. اقىرىن-اقىرىن شەشىپ جاتىرمىز»، - دەيدى «قورعاۋ استانا» قورىنىڭ الەۋمەتتىك قىزمەتكەرى گۇلجان كيسيكوۆا.
سوڭعى كەزدەرى وڭالتۋ ورتالىعىنا وتىزعا جاقىنداپ قالعان جاستار دا ءجيى باراتىن بولىپتى. كوبىنىڭ ءتولقۇجاتى جوق. ارالارىندا ەڭبەك قۇلدىعىنىڭ قۇرباندارى دا كەزدەسەدى ەكەن.
«وسىدان بىرەر جىل بۇرىن تەك قىزىل تولقۇجاتپەن جۇرگەن ادامدار كەلەتىن. ءقازىر جاستار دا بار. مۇنداي قيىن جاعدايعا تۇسەتىندەر – بالالار ۇيىنەن شىققان جاندار. كۇندە جانتۇرشىگەرلىك وقيعالاردى ەستيمىز. ماسەلەن، كەشە عانا 2 جىل بۇرىن ۇڭگىردە ءومىر ءسۇرىپ جاتقان ازاماتتارعا جاردەم بەردىك. مىنە، ءقازىر ولاردىڭ قۇجاتتارىن جاساۋعا كىرىستىك»، - دەيدى «قورعاۋ استانا» قورىنىڭ ءتوراعاسى اننا رىل.
«اۋەلى قۇقىق قورعاۋ ورگانىنا، ياعني كوشى-قون قىزمەتىنە بارۋ قاجەت. ەگەر شەتەل ازاماتى بولسا، ەلشىلىككە بارىپ، رەسمي سۇرانىس جىبەرۋ كەرەك. ادەتتە اناسىنىڭ ءتولقۇجاتى بولماسا، بالاعا دا قۇجات بەرىلمەيدى. ەگەر اناسى قايتىس بولسا، وندا قۇجاتتى جاساتۋ قيىن. وڭالتۋ ورتالىعىنان نەمەسە زاڭگەردەن كومەك سۇراعان ءجون. بۇل - ۇزاق پروسەسس»، - دەيدى زاڭگەر ماحاببات قاسەنوۆا.