جىل باسىنان بەرى الەۋمەتتىك ماڭىزى بار ازىق-تۇلىك باعاسى 17،4%-عا قىمباتتاعان.
اسىرەسە، پياز، قانت، ءسابىز، كارتوپ، قاراقۇمىق، ماكارون، ۇن جانە قىرىققاباتتىڭ باعالارى وسكەن. بۇل تۋرالى ۇكىمەت باسشىسىنىڭ قاتىسۋىمەن وتكەن مەملەكەت باسشىسىنىڭ تاپسىرمالارىن ورىنداۋ بويىنشا كەڭەستە ايتىلدى، دەپ حابارلايدى Almaty-akshamy.kz
باعا تۇراقسىزدىعى جەتىسۋ جانە جامبىل، الماتى، ماڭعىستاۋ جانە ۇلىتاۋ وبلىستارىندا، سونداي-اق نۇر-سۇلتان جانە شىمكەنت قالالارىندا بايقالادى. ماسەلەنى شەشۋ ۇشىنە پرەمەر-مينيستر «اينالىم سحەماسى» شەڭبەرىندە كاسىپكەرلىك سۋبەكتىلەرىن قارجىلاندىرۋ بويىنشا جۇمىستى جانداندىرۋدى، تۇراقتاندىرۋ قورلارىن تولىق قامتاماسىز ەتۋدى جانە بولشەك ساۋدا ۇستەمەسىنە مونيتورينگ جۇرگىزۋدى تاپسىردى. سونداي-اق، باسەكەلەستىكتى قورعاۋ جانە دامىتۋ اگەنتتىگىنە باعالىق ءسوز بايلاسۋدى باقىلاۋدى، قارجىلىق مونيتورينگ اگەنتتىگىنە زاڭسىز قانت ساتۋشىلاردىڭ جولىن كەسۋدى، ونىڭ ىشىندە الەۋمەتتىك جەلىلەر مەن قوسىمشالار ارقىلى ساتۋدى بولدىرماۋدى، سونداي-اق قانت جەتكىزۋ ارنالارىن باقىلاۋعا الۋدى مىندەتتەدى.