ەلدە «مايىتتىك دونوردىڭ» تاپشىلىعى سەزىلۋدە

ءبىر مايىتتىك دونور كەمى 4 نەمەسە ءتىپتى 7 ادامنىڭ ءومىرىن اراشالاي الادى - ماماندار.

بۇل ماسەلەنىڭ سالدارىنان دونورلىق ورگاندى قاجەت ەتەتىن 3800-دەي ازاماتتىڭ 300-گە جۋىعى وتكەن جىلى ساۋ اعزاعا قولى جەتپەستەن قايتىس بولعان. سوراقىسى سول، دونور تاپشىلىعىنىڭ ازابىن تارتىپ وتىرعانداردىڭ 100-گە جۋىعى 18 جاسقا دەينگى بالا، دەپ حابارلايدى Almaty-akshamy.kz.

24.kz اقپاراتى بويىنشا، قازاقستاندا اعزا اۋىستىرۋدى قاجەت ەتەتىندەردىڭ اراسىندا ءبىرىنشى ورىندا بۇيرەگى سىر بەرگەندەر تۇر. ەكىنشى كەزەكتە جۇرەك، ودان سوڭ باۋىر مەن ۇيقى بەزىن الماستىرعىسى كەلەتىندەر تۇر. ماماندار "ءبىر مايىتتىك دونور كەمى 4 نەمەسە ءتىپتى 7 ادامنىڭ ءومىرىن الىپ قالار ەدى" دەيدى. "ءبىراق بىزدەگى تانىم-تۇسىنىك سالدارىنان كوبىسى ودان ات-تونىن الا قاشادى. وسىدان كەيىن اۋرۋمەن بەتپە-بەت كەلگەندەرگە تەك جاقىندارى قول ۇشىن سوزىپ، اعزاسىن ءبولىپ بەرمەسە، كەلمەسكە كەتكەندەردىڭ ساۋ اعزاسىن پايدالانىپ قالۋعا ەشكىم اسىقپايدى"،- دەپ ناليدى ماماندار. ەلدە دەنساۋلىق ساقتاۋ مينيسترلىگىنىڭ بۇيرىعىمەن 40 دونورلىق اۋرۋحانا بەكىتىلگەن. سوڭعى 10 جىلدا ترانسپلانتاسيالاۋ بيۋروسىنا تەك 175 ادام عانا كەلىسىم بەرىپ، ءوتىنىش قالدىرىپتى.

«حالىق اراسىندا اعارتۋ جۇمىستارىن جۇرگىزىپ، دارىگەرلەردى وقىتىپ جاتىرمىز. مايىتتىك دونور ەندى وتە تومەن دەڭگەيدە. جاسالعان بارلىق ترانسپلانتاسيانىڭ 15 پايىزى عانا ماياتتىك دونوردان جاسالعان. بىزدە ءبىر عانا قيىندىق - ول دونورلىق ورگان دەفيسيتى. ادامدار كەلىسىم بەرمەيدى. سوندىقتان كۇتۋ پاراعىنداعى ازايمايدى، كەرىسىنشە، كوبەيىپ جاتىر»، - دەيدى ق ر دسم "ترانسپلانتتاۋدى ۇيلەستىرۋ جانە جوعارى تەحنولوگيالىق مەديسينالىق قىزمەت جونىندەگى رەسپۋبليكالىق ورتالىق" ديرەكتورى ساۋلە شايسۇلتانوۆا.