ولاردىڭ كوبى جۇمىس ىزدەپ شىققان.
بيىل قازاقستاننان سىرتقا 2 مىڭعا جۋىق وتانداسىمىز قونىس اۋدارعان، دەپ حابارلايدى Almaty-akshamy.kz ۇلتتىق ستاتيستيكا بيۋروسىنا سىلتەمە جاساپ.
ءبىرى – جالاقىسى جاقسى جۇمىس ىزدەسە، ەندى ءبىرى تۇراقتاپ قالۋدى ماقسات ەتكەندەر.
شەتەل شەكاراسىن اساتىنداردىڭ كوبى جاستار ەكەن. ءتىل بىلەتىن بولعان سوڭ، ەلدەگى جالاقى ولاردىڭ وڭ جامباسىنا كەلە بەرمەيتىن كورىنەدى. «ال بۇلاي جالعاسا بەرسە، ەلدەن كەتۋدىڭ كەرى اسەرى كوپ»دەيدى ماجىلىسمەن اسحات ايماعامبەتوۆ. دەپۋتات بۇل جاعدايدىڭ بىرنەشە سەبەبى بار دەپ پايىمدادى. بىرىنشىدەن، كۇنكورىس، تابىس ماسەلەسى بولسا، ەكىنشىدەن، ەلىكتەۋشىلىك.
«بىزدە سۇرانىستاعى مامانداردى قالىپتاستىرۋ ءۇشىن مەملەكەت كوپ كۇش جۇمسايتىنى بەلگىلى. ءمۇعالىم، دارىگەرلەرگە ءقازىر بارلىق جاعداي جاسالىپ جاتىر. سۇرانىستاعى كادر ەل ەكونوميكاسىنا، ونىڭ وسۋىنە ءوز كومەگىن تيگىزەدى. ال تاپ وسى ماماندىق يەلەرى شەتەلگە كەتەتىن بولسا، بۇل – ۇلكەن شىعىن. قازاقستاندىقتاردىڭ وزگە مەملەكەتتەرگە كوشۋگە بەيىم بولۋىن جان-جاقتى سارالاۋ كەرەك»، – دەدى ق ر پارلامەنتى ءماجىلىسىنىڭ دەپۋتاتى اسحات ايماعامبەتوۆ.
رەسمي دەرەككە سۇيەنسەك، بيىل 2 ايدا ەلدەن 2 مىڭعا جۋىق وتانداسىمىز سىرتقا كەتىپتى. ولار رەسەيگە، ال 20 پايىزدان استامى گەرمانياعا قونىس اۋدارىپتى. قالعان قازاقستاندىقتار پولشا، اقش، وزبەكستان جانە بەلارۋس ەلىنە تابان تىرەگەن.
«تۇراقتى تۇرۋ ءۇشىن ەميگراسيا بويىنشا نەگىزگى مەملەكەتتەر، ءبىرىنشى - ول رەسەي. وندا شەتەلگە كەتكەندەردىڭ 62 پايىزى وسى مەملەكەتكە تيەسىلى. گەرمانياعا 21 پايىز جەرلەسىمىز قونىس اۋداردى» – دەدى ۇلتتىق ستاتيستيكا بيۋروسىنىڭ ساراپشىسى بيبىگۇل ميراسبەك.
جىل سايىن ەلدەن كەتكەن ازاماتتاردىڭ سانى ارتىپ بارادى. ۇلتتىق ستاتيستيكا بيۋروسىنىڭ مالىمەتىنشە، وتكەن جىلى 24 مىڭعا جۋىق ادام شەت مەملەكەتكە تۇراقتى تۇرۋعا كوشىپتى. ال ەكى جىل بۇرىن رەسپۋبليكانى 32 مىڭ وتانداسىمىز تاستاپ كەتكەن.