جۇرگىزۋشى كۋالىگىن الۋعا قاتىستى تالاپتار كۇشەيگەنىمەن، قۇجاتتى زاڭسىز ساتاتىندار ازايماي تۇر.
ءتىپتى شەتەلدىكتەرگە قازاقستاندىق قۇجاتتىڭ جالعان نۇسقاسىن ۇسىناتىن ارنايى سايت ىسكە قوسىلعان. ەل اراسىندا «سپەسسون» اتالىپ كەتكەن ارنايى حالىققا قىزمەت كورسەتۋ ورتالىقتارى الدىندا اشىقتان-اشىق ساۋدا جۇرگىزىپ كەلگەن دەلدالدار ەندى الەۋمەتتىك جەلىگە كوشكەن. جۇرگىزۋشى كۋالىگىن جاڭادان الۋشىعا دا، ءتىپتى كولىك تىزگىندەۋ قۇقىعىنان ايىرىلعاندارعا دا كومەكتەسەمىز دەگەن حابارلاندىرۋدان كوز سۇرىنەدى. ءۇش كۇن ىشىندە ەشبىر ەمتيحانسىز، ءتىپتى كەزەككە تۇرماي-اق جاساپ بەرەمىز دەپ جۇرتتى قىزىقتىرعاندار دا جەتەرلىك، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
رەسەي ازاماتتارى ءۇشىن قازاقستاندىق كۋالىكتى ۇسىناتىن ارنايى سايتتى دا كوزىمىز شالدى. قىزمەت قۇنى – 29 500 رۋبل، ياعني 180 مىڭ تەڭگە شاماسىندا. «قۇجاتتى ءتۇپنۇسقادان اينىتپاي، ساپالى جاسايمىز» دەگەن جارناماسى دا بار. ءتيىستى انكەتانى تولتىرىپ، فوتو جولداساڭىز كوپ ۇزاماي حابارلاسۋى ءتيىس.
جۇرگىزۋشى كۋالىگىنىڭ باعاسى ءار قالادا ءارتۇرلى. 80 مىڭنان باستاپ جارتى ملن-عا دەيىن بارادى. زاڭسىزدىققا حالىققا قىزمەت كورسەتۋ ورتالىعى ماماندارىنىڭ دا قاتىسى بار. انتيكور قىزمەتى سوڭعى ءۇش جىلدا 60 مىڭداي دەرەكتى انىقتاپ، 18 قىلمىستىق ءىس قوزعاعان. ىشكى ىستەر مينيسترلىگى قۇجاتتى زاڭسىز ساۋدالاعاندار دا، ونى ساتىپ العاندار دا جاۋاپقا تارتىلادى دەپ ەسكەرتتى. ايىپپۇل تولەپ قانا قويماي، باس بوستاندىعىنان ايىرىلۋى مۇمكىن.
«جاساعان ادامعا ەكى جىلعا باس بوستاندىعىنان ايىرۋ قاراستىرىلسا، جالعان قۇجاتتى پايدالانعان ادامدارعا 40 تاۋلىككە دەيىن قاماققا الىنادى. قازىرگى تاڭدا الەۋمەتتىك جەلىدە تاراپ جاتقان جارنامالاردىڭ كوبىسى جالعان اقپارات بولىپ كەلەدى. ياعني، قازىرگى تاڭدا تاراپ جاتقان الاياقتىقتىڭ ءبىر ءتۇرى»، - دەيدى ق ر ءىىم تەرگەۋ دەپارتامەنتىنىڭ اسا ماڭىزدى ىستەر جونىندەگى اعا انىقتاۋشىسى جەڭىس جاقسىلىقوۆ.
ال جۇرگىزۋشىلەر وداعىنىڭ وكىلدەرى مۇنداي قىلمىستىڭ تامىرىنا بالتا شابۋ ءۇشىن ەڭ الدىمەن كۋالىكتى زاڭسىز جولمەن الۋشىلار نەگە كوپ دەگەن سۇراقتىڭ استارىنا ءۇڭىلۋ كەرەك دەيدى. اۆتومەكتەپتە وقۋدىڭ مىندەتتەلمەۋى، ەمتيحان سۇراقتارىنىڭ قولجەتىمسىزدىگى جەمقورلىققا تۇرتكى بولعان. ودان قالدى سىناق تاپسىرۋعا ارنالعان كولىكتەر جەتىسپەيدى. بار بولعاننىڭ وزىندە قايتا-قايتا ىستەن شىعادى.
جۇرگىزۋشى كۋالىگىن كىم كورىنگەننىڭ ساتىپ الا بەرۋى - ۇلكەن قاۋىپكە اپاراتىن جاعداي. اۆتومەكتەپكە بارماعان، قاراپايىم جول ەرەجەسىنەن بەيحابار ادامنىڭ كەسىرىنەن تالاي وتباسى قارا جامىلۋى مۇمكىن. ەلدە ءار ءۇش ساعات سايىن جول اپاتىنان ءبىر ادام قايتىس بولاتىنىن ەسكەرسەك، بۇل – بۇگىنگىنىڭ وزەكتى ماسەلەسى.