قازاقستاندا كورپوراتيۆتىك كەش ورتاشا ەسەپپەن قانشاعا شىعادى؟
جاڭا جىلدى ۇجىم بولىپ تويلاۋ ۇلكەن قالالاردا داستۇرگە اينالعان. قىزمەتتەس ارىپتەستەر جاڭا جىل مەرەكەسىن كوتەرىڭكى كوڭىل-كۇي، توي-دۋمانمەن اتاپ وتۋگە تىرىسادى. الايدا، سالتاناتتى كەشتىڭ ويداعىداي ءوتۋى ءۇشىن كومپانيالار قوماقتى سوما ءبولۋى كەرەك.
كوپتەگەن قالالاردا جاڭاجىلدىق كەشتەردى نەگىزىنەن يۆەنت-اگەنتتىكتەر ۇيىمداستىرادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ولاردىڭ قىزمەتى ءبىر ميلليون تەڭگەدەن باستالادى. وعان مەيرامحانا نەمەسە بانكەت زالىن تاڭداۋ، جۇرگىزۋشى، ديدجەي، قۇرال-جابدىقتار مەن ءىس-شارانىڭ جەكە سەنارييى كىرەدى.
«كورپوراتيۆتىك كەشتەردىڭ باعاسى ءار ءتۇرلى پارامەترلەرگە بايلانىستى. بىرىنشىدەن، ادامدار سانىنا، ەكىنشىدەن، كۇنىنە - بۇل جەردە ول وتە ماڭىزدى ءرول اتقارادى، ويتكەنى مەرەكە كۇندەرى جۇكتەمە مەن جاۋاپكەرشىلىك كوپ بولادى، سايكەسىنشە، تولەم ازداپ كوتەرىلەدى، ۇشىنشىدەن، بيۋدجەتكە بايلانىستى بولادى. مىسالى، كليەنت بىزگە ءوز بيۋدجەتىن بەرەدى، ءبىز سوعان سايكەس قىزمەتتەرىمىزدى ۇسىنامىز. مۇندا باعا ءارتۇرلى، 500 مىڭنان 5 ميلليون تەڭگەگە دەيىن جانە ودان دا جوعارى. مەرەكەنىڭ فورماتى دا اۋقىمدى – بىرەۋ كەشتى كەڭسەدە ۇيىمداستىرعاندى ءجون كورسە، ەندى ءبىرى مەيرامحانا تاڭدايدى»، – دەيدى مەرەكە ۇيىمداستىرۋشى ءۇمىت.
جاڭا جىل قارساڭى – مەيرامحانا مەن كافە يەلەرى ءۇشىن دە ناعىز قىزعان شاق. مەيرامحانالار دايىندىقتى جەلتوقسان ايىنىڭ باسىندا-اق باستاپ كەتتى. بۇگىندە ولار جاڭاجىلدىق كورپوراتيۆتەرگە تاپسىرىس قابىلداپ جاتىر. الماتى مەيرامحانالارىندا جاڭاجىلدىق كورپوراتيۆتەر ورتا ەسەپپەن ادام باسىنا 11 مىڭ تەڭگەدەن 40 مىڭعا دەيىن بارادى.
وڭتۇستىك استاناداعى مەيرامحانالار جاڭا جىلعا دايىندىقتى باستاپ كەتتى. ءتىپتى، كورپوراتيۆتى كەش وتكىزۋگە دايىن ەكەندەرىن ايتىپ، الەۋمەتتىك جەلىلەردە تالاسا جارنامالاپ جاتىر. ادەتتە، جاڭاجىلدىق كورپوراتيۆتەر 25 جەلتوقساننان باستالادى.
قالانىڭ جوعارعى جاعىندا ورنالاسقان مەيرامحانالاردا جاڭاجىلدىق كورپوراتيۆتىك مەرەكە ادام باسىنا 40 مىڭنان كەلەدى. ول باعاعا سالاتتار، باسىتقىلار، ەكى ىستىق تاعام، ىشىمدىكتەر، گازدالعان جانە گازدالماعان سۋسىندار، تاتتىلەر، جەمىستەر كىرەدى. سونىمەن قاتار، اقشاقار مەن اياز اتا، اسابا مەن مۋزىكانتتار بار. ولار كونكۋرستار وتكىزىپ، ءتۇرلى سىيلىقتار وينالاتىن لوتەرەيالار ويناتادى.
الماتىنىڭ ورتالىعىندا ورنالاسقان مەيرامحانالاردا جاڭاجىلدىق كورپوراتيۆتەر ادام باسىنا 17- 20 مىڭ تەڭگە ارالىعىندا. داستارحان مازىرىندە 4 ءتۇرلى باسىتقى، 3 ءتۇرلى سالات، 2 ىستىق تاعام، شاي، نان مەن سامسا، تاتتىلەر بار. شوۋ-باعدارلاما دا قاراستىرعان.
ءداستۇرلى تۇردە ارزانداۋ دەپ ەسەپتەلەتىن قالانىڭ تومەنگى جاعىنداعى مەكەمەلەرگە كەلسەك، وندا وتىرىس ادام باسىنا 11 مىڭ تەڭگەدەن 15 مىڭعا دەيىن بارادى. مازىردە 2 ىستىق تاماق، 3-4 سالات، تىسكە باسار، نان، باۋىرساق بار. سپيرتتىك ىشىمدىك پەن جەمىستەردى جانە ءتاتتى تاعامداردى وزىمەن الىپ كەلۋگە رۇقسات ەتىلەدى. ودان باسقا مۇندا شوۋ-باعدارلاما مەن مۋزىكالىق كوركەمدەۋ قاراستىرىلعان.
قازاقستاننىڭ باسقا ايماقتارىنا كەلەتىن بولساق، شاعىن قالالاردا ورنالاسقان مەيرامحانالاردىڭ باعاسى الدەقايدا تومەن، مىسالى، ورال مەن پەتروپاۆلدا ادام باسىنا 10-15 مىڭ تەڭگە ارالىعىندا، ال استانادا كافە، مەيرامحانا، كاراوكە باعاسى 15مىڭنان 27 مىڭ تەڭگەگە دەيىن. ەلدەگى ءۇشىنشى مەگاپوليس – شىمكەنت قالاسىندا ادام باسىنا ورتا ەسەپپەن 18 مىڭ تەڭگەدەن شىعادى. بارلىق جەردە باعاعا شوۋ-باعدارلاما، جۇرگىزۋشىلەر، مۋزىكانتتار جانە مەرەكەلىك اس ءمازىرى كىرەدى: الكوگولدى سۋسىنداردى قوسپاعاندا، ىستىق تاعامدار، سالاتتار، جەڭىل تاعامدار، جەمىستەر بار.
كەيبىر ءىرى كومپانيالار قىزمەتكەرلەرىنىڭ كوڭىلىن كوتەرۋ ءۇشىن مۋزىكانتتار مەن ارتيستەردى شاقىرادى. كەشتى جۇرگىزۋگە شوۋ-بيزنەس سالاسىنىڭ تانىمال جۇلدىزىن دا شاقىرۋى مۇمكىن. كەشتىڭ شىرايىن كىرگىزىپ، ءسانىن كەلتىرەتىن ارتيستەر سىباعاسىنا قىرۋار اقشا سۇرايدى.
وسى ساۋالنامانى جۇرگىزگەن تىلشىلەر كوپتەگەن جۇلدىزداردىڭ كونسەرت ديرەكتورلارىنا حابارلاسىپ، ولاردىڭ باعاسىن ءبىلدى. بەلگىلى بولعانداي، كوپتەگەن انشىلەر جاڭاجىلدىق كەشتەرگە تاپسىرىس الىپ قويعان ەكەن. وتاندىق جۇلدىزدار ءبىر كەشتە 7- 8 ءان ايتادى. ونىڭ قۇنى 1 ميلليون تەڭگەدەن باستالادى.
مىسالى، ەركە ەسماحان ەلىمىزدىڭ باسا قالالارىندا وتەتىن سالتاناتتى شاراعا 3-4 ملن تەڭگە سۇرايدى. ەگەر الماتى قالاسىندا بولسا، وندا سوما ءبىرشاما تومەن. ياعني، 2 ملن تەڭگەگە 7-8 ءان ايتادى.
لۋينا 1،2 ميلليون تەڭگەگە كەشىڭىزدى كەرەمەت قىپ وتكىزىپ بەرمەك.
جاستاردىڭ سۇيىكتى ءانشىسى نۇربولات قانايدىڭ 40 مينۋت ءان سالعانى 2 ميلليون ەكەن.
داستان ورازبەكوۆ ءبىر كەشتەن 1،5 ملن تەڭگە الادى.
ايدانا مەدەنوۆا 1 ملن تەڭگەگە قوناقتارىڭىزدىڭ كوڭىلىن كوتەرۋگە ءازىر.
ايتا كەتەيىك، جوعارىدا اتالعان انشىلەردىڭ باسىم بولىگى اقشالارىنىڭ 50 پايىزىن الىپ تا قويعان.
قازاقستاندا جاڭاجىلدىق كورپوراتيۆتىك كەشتەرگە رەسەيلىك جۇلدىزداردى دا شاقىراتىن كومپانيالار بار. ماسەلەن، رەسەيلىك تەلەارنالاردىڭ ءبىرىنىڭ مالىمەتىنشە، فيليپپ كيركوروۆتىڭ جاڭا جىل تۇنىندەگى ونەرى 300 مىڭ دوللار (140 ملن تەڭگە)، ال ديما بيلان 37 ملن تەڭگەگە ءان سالىپ بەرۋگە ءازىر. Niletto مەن Zivert تە وسى سوماعا كەلىسەدى. ال كلاۆا كوكا ءوز ونەرىن 45 ملن تەڭگەگە باعالاپ وتىر.