ەلدە القابيلەر سوتىنىڭ وكىلەتتىلىگى كەڭەيتىلەدى

القابيلەردىڭ قاراۋىنا بەرىلەتىن ىستەردىڭ سانى ارتادى.

ءماجىلىس قابىرعاسىندا اتالمىش قۇقىقتىق ينستيتۋتتى جەتىلدىرۋگە باعىتتالعان وزگەرىستەر ءبىرىنشى وقىلىمدا ماقۇلداندى، دەپ حابارلايدى Almaty-akshamy.kz 24.kz-كە سىلتەمە جاساپ. 

زاڭ جوباسىنا سايكەس ەندى القابيلەر سوتىندا شەشىمدى سۋديانىڭ قاتىسۋىنسىز 11 القابي قابىلداي الادى. ال سوتقا جەتكەن ءىس پروكۋرورعا «قايتا تەرگەۋ» ءۇشىن قايتارىلمايدى. بۇل قۇقىق قورعاۋ ورگاندارىنا قىلمىستىق ءىستىڭ كەم-كەتىگىن جاماپ-جاسقاۋعا مۇمكىندىك بەرمەيدى. زاڭ جوباسىندا، سونداي-اق، كاسىپكەرلەردىڭ قۇقىقتارىن قورعاۋ شارالارى كۇشەيتىلگەن. ەندى بيزنەس يەلەرىن قىلمىستىق قۋدالاۋ شەڭبەرىنە نەگىزسىز تارتۋعا جول بەرىلمەيدى.

«ءبىز كاسىپكەرلەردىڭ قۇقىقتارىن قورعاۋ بويىنشا ناقتى ۇسىنىستاردى جاسادىق. ونىڭ ىشىندە، مىسالى قۇقىق قورعاۋ ورگاندارى قىلمىستىق ءىستى تىكەلەي قوزعاي المايدى. تەك قانا ناقتى ءبىر ارەكەتتىڭ ناتيجەسىندە ەكونوميكالىق شىعىن، زيان كەلتىرگەنى دالەلدەنگەن بولسا، وسى قۇجاتتىڭ نەگىزىندە عانا قىلمىستىق ءىس قوزعالۋى مۇمكىن»، - دەيدى ق ر ادىلەت ءمينيسترى ازامات ەسقارايەۆ.