بيىلعى اقپاننىڭ قورىتىندىسى بويىنشا اياق كيىم باعاسى ءبىر جىل ىشىندە 20،5 پايىزعا وسكەن.
ونىڭ ىشىندە ەرلەر مەن ايەلدەر اياق كيىمى 18،2%-عا، بالالار اياق كيىمى 26،5%-عا قىمباتتادى، دەپ حابارلايدى Almaty-akshamy.kz. Astanatv.kz-كە سىلتەمە جاساپ.
ەnergyprom زەرتتەۋىنە سۇيەنسەك، باعانىڭ وسكەنىن، اسىرەسە، ماڭعىستاۋ وبلىسىنىڭ تۇرعىندارى سەزىندى: وڭىردە اياق كيىم باعاسى ءبىر جىلدا بىردەن 31،5%-عا قىمباتتاعان. سونداي-اق شىمكەنت (30،2%) پەن استانا (28%) دا باعا ءوسىمى بويىنشا الدىڭعى ورىنعا شىقتى. ەڭ تومەن باعا ۇلىتاۋ وبلىسىندا تىركەلدى، دەگەنمەن ءوسىم 13،7% قۇرايدى.
«ەرلەر اياق كيىمى اقتوبە وبلىسىندا، ايەلدەر اياق كيىمى ماڭعىستاۋ وبلىسىندا، بالالار اياق كيىمى شىمكەنتتە كوپ قىمباتتادى. ەرلەرگە ارنالعان اياق كيىم باعاسىنىڭ ەڭ تومەنگى كورسەتكىشى ۇلىتاۋ وبلىسىندا، ايەلدەردىكى باتىس قازاقستان وبلىسىندا، بالالار اياق كيىمىنىڭ باعاسى قوستاناي وبلىسىندا تىركەلدى. ىشكى نارىقتا اياق كيىم ساتىلىمى 40،3 ملن جۇپتى قۇرادى، بۇل ءبىر جىل بۇرىنعىدان 21،6%-عا از»، - دەيدى ساراپشىلار.
بيىلعى قاڭتار-اقپان ايلارىندا رەسپۋبليكادا 286،7 مىڭ جۇپ اياق كيىم شىعارىلدى، بۇل ءبىر جىل بۇرىنعىدان 42،9 پايىزعا ارتىق.
«وڭىرلىك تۇرعىدا ەڭ كوپ اياق كيىم الماتىدا شىعارىلدى: 153 مىڭ جۇپ – بۇل 2022 جىلدىڭ قاڭتار-اقپانىمەن سالىستىرعاندا 50،4%-عا ارتىق. ۇزدىك ۇشتىككە الماتى (48،5 مىڭ جۇپ) جانە جامبىل (27،9 مىڭ جۇپ) وبلىستارى دا كىردى»، - دەلىنگەن زەرتتەۋدە.
ايتا كەتەرلىگى، جالپى 2022 جىلدىڭ قاڭتار-جەلتوقسان ايلارىندا ەلىمىزدە 1،7 ملن جۇپ اياق كيىم شىعارىلدى، بۇل ءبىر جىل بۇرىنعىدان 17،6 پايىزعا ارتىق.